Ջերմուկէն տեսանելի վայրի մէջ անզէն աչքով հնարաւոր է տեսնել Հայաստան ներթափանցած ատրպէյճանական խումբը:  Նոյեմբերի 7-ին լրագրողներու հետ զրոյցի ընթացքին Վայոց ձորի մարզպետ Արարատ Գրիգորեան նշած է․

«Մեր տեղեկութիւններով, ատրպէյճանական խումբը տակաւին դուրս չէ եկած, բայց գլխաւոր շտաբը աւելի լաւ պիտի տիրապետէ այդ տեղեկութեան: Մենք անզէն աչքով կը տեսնենք զիրենք՝ տեսանելի տարածքի վրայ: Դուք պէտք է գլխաւոր շտաբի պետին հարցնէք, թէ ինք ո՞ր խումբը նկատի ունեցած է, երբ յայնտած է, թէ հեռացած են»:

Յիշեցնենք, որ Գլխաւոր շտաբի պետ Էդուարդ Ասրեան յայտարարած էր, որ Սեպտեմբերի 13-էն ետք Ջերմուկի ուղղութեամբ մնացած հակառակորդի ստորաբաժանումները, կրելով կորուստներ, ետ  շպրտուած են: 

Արարատ Գրիգորեանի խօսքով, սահմանին իրավիճակը յարաբերականօրէն կայուն է, Ջերմուկի մէջ որեւէ միջադէպ չէ գրանցուած:

Արեւմտեան Հայաստանը կը պահանջէ, որ թուրք-ատրպէյճանական զօրամիաւորումները լքեն բնիկ հայկական տարածքները, զորս բռնազաւթած են ինչպէս վերջին պատերազմական գործողութիւններու ընթացքին, այնպէս ալ անկէ առաջ։ Կը յորդորենք Հայաստանի Հանրապետութեան մէջ գտնուող Եւրոպական Միութեան դիտորդական խումբերու ուշադրութիւնը հրաւիրել նմանօրինակ դէպքերու վրայ։