Լաչինի միջանցքով զինուորական տեխնիկա տեղափոխելու վերաբերեալ ատրպէյճանական թելէկրամեան ալիքներուն տարածած տեղեկութիւնը, Արցախի Արտաքին գործոց նախարար Դաւիթ Բաբայեան տեղեկատուական ահաբեկչութիւն որակած է։ Անոր խօսքով, ռուս խաղաղապահները մարդասիրական օգնութիւն  տեղափոխած են, իսկ ատրպէյճանական կողմն այդ առիթէն կ’օգտուի ու հերթական անգամ կը սադրէ տարբեր դրդապատճառներով։

«Նախ եւ առաջ, որպէսզի ահաբեկեն ժողովուրդը, որ ըսեն՝ տեսէք՝ ամէն վայրկեան կրնանք կտրել միջանցքով ընթացող բոլոր հոսքերը՝ բեռնափոխադրումները, մարդոց փոխադրումները եւ այլն, կաթուածահար ընել Արցախը», – ըսած է նախարարը։

Դաւիթ Բաբայեան կ’ընդգծէ, որ Արցախը Հայաստանի հետ կապող միակ՝ Լաչինի միջանցքը միջազգային պայմանաւորուածութեան արդիւնք է, եւ Պաքու նման սադրանքներով կը փորձէ այն խափանել:

Արեւմտեան Հայաստանը կը պահանջէ բռնազաւթիչ Ատրպէյճանէն չդիմել սադրիչ գործողութիւններու, հակառակ պարագային կրնան ականատես ըլլալ հայ ոգիի իրական զօրութեան։ Մենք խաղաղասէր ազգ ենք, եւ անկէ շատ յաճախ կ’օգտուի հարեւան արհեստածին պետութիւնը՝ իր հերթական սադրանքներով։ Քանի որ, տուեալ գործողութիւնը տեղի  ունեցած է նաեւ խաղաղապահներու մասնակցութեամբ, ասոր համապատասխան արձագանգ պէտք է տայ նաեւ ռուս խախաղաղապահներու հրամանատարը, լռեցնելով ատրպէյճանական վայրահաչոցները, որոնք նիւթական մեծ օժանդակութեամբ կը տարածուին միջազգային հանրութեան ծիրին մէջ, հայկական կողմին համար ստեղծելով ոչ բարենպաստ դիրքեր դիւանագիտութեան մէջ։