Նոյեմբերի 9-ին, Ստեփանակերտի Վահրամ Փափազեանի անուան պետական թատրոնի շէնքին մէջ տեղի ունեցած է լուսանկարիչ Սեւակ Ասրեանի «Յիշողութեան ուժը» խորագիրը կրող լուսանկարներու անհատական ցուցահանդէսը։

Ցուցահանդէսին ներկայացուած է  44 լուսանկար, որոնք կը ներկայացնեն  44-օրեայ պատերազմի ընթացքին թշնամիին կողմէ բռնազաւթուած արցախեան բնակավայրեր, բնութեան պատկերներ եւ եկեղեցիներ։

«Լուսանկարներու մեծ մասը նկարուած է 2016-2019 թուականներու ընթացքին, մէկ մասն ալ՝ 2020 թուականի ամրան։ «Իւրաքանչիւր նկար ինծի համար մեծ ցաւ է, յիշողություն, որոնց նայելով կը հասկնամ, թէ ինչեր կորսնցուցած ենք, որոնք ժամանակին չենք գնահատած»,- ըսած է լուսանկարիչը։

«Պիտի կազմուի նաեւ լուսանկարներու ալպոմ, որուն վաճառքէն ստացուած ամբողջ հասոյթը պիտի ուղղոուի Մարտունի շրջանի Հաղորտի գիւղին մէջ ջրամատակարարման խնդիրը լուծելու ծրագիրին»,- աւելցուցած է Ս. Ասրեան։