Արեւմտեան Հայաստանի Տիգրանակերտի Ենիշեհիր գաւառին մէջ «քաղաքային վերափոխման» անուան տակ կատարուող շինարարական աշխատանքներու ընթացքին Պէն ու Սէն թաղամասին մէջ ի յայտ եկած են պատմական կառոյցի աւերակներ։ Թէեւ պատմութեան եւ կառուցուածքի մասին յստակ տեղեկութիւններ չկան, անոնք  ենթադրաբար կը պատկանին շատ հին ժամանակներու: Աւերակներու կառուցուածքն ու քարերու ձեւը կարծես թէ համադրելի են Տիգրանակերտի պարիսպներու կառուցուածքին հետ։

Սակայն, որոշ հնագէտներու կողմէ որպէս «Երկրորդ պարիսպ» բնութագրուող աւերակները,  քաղաքապետարանի աշխատակիցներու հրահանգով կը ծածկուին հողով ու կրաձոյլով։

Մտահոգութիւն կայ, որ պատմական աւերակները կրնան ոչնչանալ՝ այդպէս ալ  չբացայայտուած: Հողով եւ կրաձոյլով ծածկուած տարածքին մէջ կ’իրականացուին կանաչապատման եւ հեծանուային վազքուղիի կառուցման աշխատանքներ։ Եթէ այդ աշխատանքները չկասեցուին, պատմութիւնը եւս մէկ անգամ պիտի թաղուի հողին տակ։