Վանայ լիճի ամէնէն խոր կէտը 471մ է, իսկ միջին խորութիւնը՝ 171մ։  Վանայ լիճը սոտայով հարուստ ամենամեծ լիճն է աշխարհի մէջ։ Վանայ լիճին հետ կապուած օրակարգին կամ լուրերուն մէջ  ամէնէն շատ ուշադրութիւն կը գրաւեն աղտոտածութեան մասին բողոքները։ Ցաւօք, մենք յաճախ ականատես կ’ըլլանք, թէ ինչպէս կոյուղաջուրերու եւ աղբակոյտերու պատճառով Վանայ լիճի աւազանի բնապահպանական համակարգը կ’ենթարկուի ոչնչացման։

Այնուամենայնիւ, Վանայ լիճը զբօսաշրջութեան բնագաւառին մէջ ունի մեծ գրաւչութիւն:

Եփրատի համալսարանի Բնագիտական ճիւղի Քիմիայի ամպիոնի դոկտոր-փրոֆեսոր Մեհմէթ Եամանի կատարած տարրալուծական վերլուծութիւնները գիտականօրէն ապացուցած են, որ լիճին մէջ  ուրանի լուծոյթ յայտնաբերուած է։ Տիգրիս եւ Եփրատ գետերու ջուրերէն վերցուած նմոյշերու մէկ լիթրին մէջ յայտնաբերուած էր 1 միքրօկրամ ուրան, իսկ Վանայ լիճի 30 տարբեր հատուածներէ վերցուած ջուրերու մէկ լիթրին մէջ միջին հաշուով յայտնաբերուած է 76 միքրօկրամ ուրան։

Կ’ենթադրուի, որ ուրանի տարրը պիտի գործէ այլընտրանքային ուժանիւթի ոլորտին մէջ եւ պիտի բաւարարէ ատոմակայաններու եւ ապագային ելեկտրականութեան արտադրութեան 70%-ը։

Արեւմտեան Հայաստանը յաճախ կը լուսաբանէ Վանայ լիճի բնապահպանական աղէտը, սակայն այժմ մէկ այլ մտահոգութիւն ալ ուրանի յայտնաբերումն է, քանի որ հաւանական է, որ թրքական ղեկավարութիւնը այժմ  որոշէ օգտագործել ուրանի պաշարները եւ լիճը հասցնէ ցամքելու:

Leave a Reply