Արցախի Ազգային ժողովի պետաիրաւական հարցերու մշտական յանձնաժողովի Նոյեմբերի 14-ի նիստին քննարկուած է Արցախի Հանրապետութեան նախագահին կողմէ օրէնսդրական նախաձեռնութեան կարգով ներկայացուած «Ընտրական օրէնսգիրքին մէջ փոփոխութիւններ եւ լրացումներ կատարելու մասին» եւ ««Հանրաքուէի մասին» օրէնքին մէջ փոփոխութիւններ կատարելու մասին» օրէնքներու նախագիծերու փաթեթը: Այս լուրը կը յայտնեն Արցախի ԱԺ մամլոյ ծառայութենէն: Տեղեկատւութեան համաձայն, նախագիծերու ընդունումը պայմանաւորուած է Արցախի Հանրապետութեան բռնազաւթուած տարածքներու՝ Արցախի Հանրապետութեան քաղաքացիներու ընտրական իրաւունքի փաստացի իրականացումն ապահովելու անհրաժեշտութեամբ: Փաթեթով առաջարկուած է ընտրողներու ցուցակները կազմել ըստ ընտրողներու հաշվառման վայրի հասցէներու, իսկ Արցախի Հանրապետութիւն կամ Հայաստանի Հանրապետութիւն գտնուող բռնազաւթուած տարածքներու Արցախի Հանրապետութեան քաղաքացութիւն ունեցող անձերու ընտրողներու ցուցակները՝ ըստ գտնուելու վայրի հասցէներու՝ այդ կերպով նպաստաւոր պայմաններ ստեղծելով քուէարկութեան կազմակերպման համար: