Հերթական ցոյցի ժամանակ արցախցիները նամակ յանձնեցին Հայաստանի մէջ Ֆրանսայի դեսպանատան։ «Մենք շնորհակալութիւն կը յայտնենք Ֆրանսային եւ Մաքրոնին՝ Արցախի հարցով իրենց դիրքորոշման համար։ Ֆրանսայի Սենատին մէջ այսօր կը քննարկուի բանաձեւ, որով նախատեսուած է շարք մը հայամէտ հարցեր բարձրացնել։ Ճիշդ է, Ֆրանսայի Սենատի որոշումը պարտադրանք չէ իրենց կառավարութեան համար, բայց ճնշում է։ Բանաձեւին մէջ քանի մը հետաքրքրական կէտեր կան՝ Արցախի մէջ մարդասիրական գրասենեակի բացման առաջարկը, պահանջել Ատրպէյճանէն զօրքերը հանել Ջերմուկէն, Հայաստանին զէնք տալ։ Նաեւ կ’ուզեն քննարկել, որ Օգոստոսի 22-ին տրուած Բերձորի եւ Աղաւոյի դիրքերէն ալ դուրս գան թուրքերը, Լաչինի միջանցքը վերականգնէ իր գործունէութիւնը։ Սենատը նաեւ Արցախի ճանաչման մասին 2020 թուականի որոշման յղում պիտի կատարէ, պիտի փորձեն ճնշել կառավարութիւնը՝ այս հայանպաստ դիրքորոշումներն ընդունելու համար»,- ըսաւ «Յանուն Հադրութի» ՀԿ նախագահ Լեւոն Հայրեան։