Մեծի Տանն Կիլիկիոյ Հայրապետական Աթոռը, գլխաւորութեամբ   Արամ Ա. կաթողիկոսին, տարիներէ ի վեր  լծուած է արեւմտահայերէնի պաշտպանութեան աշխատանքին:

Ընթացիկ տարուան Հոկտեմբերին Միացեալ Նահանգներու Արեւմտեան թեմը գումարեց Ազգային երեսփոխանական 50-րդ ժողովը, որուն ընթացքին առաջնորդ Թորգոմ եպս. Տօնոյեան ըսաւ, որ յատուկ հիմնադրամ մը պէտք է գոյացուի, որպէսզի արեւմտահայերէն լեզուի պաշտպանութիւնը հայրապետական աթոռը յառաջ տանի վերանորոգ թափով: Ժողովը միաձայնութեամբ որդեգրեց Թորգոմ եպիսկոպոսին մտածումը եւ քաջալեր հանդիսացաւ նմանօրինակ հիմնադրամի մը ստեղծման:

Այս նպատակով առաջնորդ սրբազանն ու Ազգ. վարչութիւնը ունեցան միատեղ խորհրդակցութիւն, որ յանգեցաւ Անթիլիասի մէջ արեւմտահայերէն լեզուի պաշտպանութեան հիմնադրամի հաստատման, հարիւր հազար տոլարով:

Այս առիթով առաջնորդ սրբազանը կոչ կ՛ուղղէ բոլորին, որ արեւմտահայերէնի պաշտպանութեան խնդիրը նկատեն խիստ կարեւոր, անմիջական, եւ իրենք եւս իրենց նիւթաբարոյական զօրակցութիւնը բերեն ազգային-ռազմավարական նշանակութիւն ունեցող այս անյետաձգելի ու կենսական ծրագրին: