Պարոն Պրունօ Ռեթալիոյի, Քրիստիան Քեմպոնի, տիկին Էլիան Ասասիի, Փաթրիկ Քանների, Էրուէ Մարսէլի եւ Կիլպերթ-Լիւք Տեւինազի կողմէ ներկայացուած է բանաձեւի առաջարկ   Ատրպէյճանի դէմ պատժամիջոցներ կիրառելու եւ ապահովելու անոր զինուած ուժերու անյապաղ դուրսբերումն   Հայաստանի տարածքէն, պահանջելով հետեւիլ 2020 թուականի Նոյեմբերի 9-ին ստորագրուած զինադադարի համաձայնագիրին եւ աջակցիլ երկու երկիրներուն միջեւ կայուն խաղաղութեան հաստատման ուղղուած որեւէ նախաձեռնութեան։

Հաշուի առնելով Սահմանադրութեան 34-1 յօդուածը, Միացեալ ազգերու կազմակերպութեան 1945 թուականի Յունիսի 26-ի կանոնադրութիւնը, 1949 թուականի Ապրիլի 4-ի Հիւսիս-աթլանթեան պայմանագիրը,1969 թուականի Յունուարի 4-ի Ցեղական խտրականութեան բոլոր ձեւերու վերացման մասին միջազգային համաձայնիագիրը, ՄԱԿ-ի Գլխաւոր համախմբման 2005 թուականի Սեպտեմբերի 16-ի 60/1 պաշտպանութեան պատասխանատւութեան մասին բանաձեւը , 2020 թուականի Նոյեմբերի 9-ի զինադադարի համաձայնագիրը, 2020 թուականի Նոյեմբերի 25-ին Սենատի կողմէն ընդունուած Լեռնային Ղարաբաղի Հանրապետութիւնը ճանչնալու անհրաժեշտութեան մասին (2020-2021) թիւ 26 որոշումը,  կրնանք ըսել, որ Արցախի  եւ Հայաստանի մէջ հարաւային եւ հարաւ-արեւելեան շրջաններուն մէջ ատրպէյճանական զինուժի կրկնուող յարձակումը կը հանդիսանայ այս պետութեան ինքնիշխանութեան եւ երկու կողմերուն միջեւ կնքուած հրադադարի պայմանագիրներու խախտում։

Հաշուի առնելով  ներքոգրեալ կէտերը․

1․ Եւրոպայի խորհուրդի՝ ցեղապաշտութեան եւ անհանդուրժողականութեան դէմ եւրոպական յանձնաժողովի (ECRI) եւ ՄԱԿ-ի Ցեղական խտրականութեան վերացման կոմիտէի (CERD) զեկոյցները կը վկայեն Ատրպէյճանի մէջ հայ բնակչութեան ազատ ապրելու անհնարինութիւնը․
2․Լեռնային Ղարաբաղ ապրող հայ բնակչութեան անվտանգութիւնն ու ազատութիւնը երաշխաւորուած չեն Ատրպէյճանի Հանրապետութեան կողմէ․
3․Լեռնային Ղարաբաղի հակամարտութիւնը եւ Ատրպէյճանի ու Հայաստանի միջեւ հակամարտութիւնը տեղի կ’ունենայ յատկապէս անկայուն տարածաշրջանի մէջ, որ մօտ է Եւրոպական միութեան, եւ կը պարունակէ սրման վտանգ, որուն մէջ կրնան ներգրաւուիլ տարածաշրջանային ուժերը.
4․Եւրոպական միութեան հովանիին ներքոյ խաղաղ բանակցութիւններու վրայ կ’ազդեն Ռուսիոյ եւ Ուքրանիոյ միջեւ հակամարտութիւնը եւ Եւրոպական միութեան ուժանիւթի ինքնավարութեան հետ կապուած ռազմավարական խնդիրները.
5․1994 թուականէն ի վեր Ֆրանսայի ջանքերը Մինսկի խումբի ծիրին մէջ, ուր ան համանախագահ է Ռուսիոյ եւ Միացեալ Նահանգներուն հետ միասին՝  Լեռնային Ղարաբաղի հակամարտութեան խաղաղ կարգաւորման հասնելու համար.
6․ Ուքրանիոյ հակամարտութեան ազդեցութիւնը Մինսկի խումբի՝ իր առաքելութիւնը կատարելու ունակութեան վրայ. Ընդ որում, հաշուի առնելով, որ այդ գործընթացը մշտապէս կը խոչընդոտուի Ատրպէյճանի՝   ռազմական լուծման դիմելուն պատճառով.
7․ Միջազգային հանրութեան դատապարտումը եւ ՄԱԿ-ի Անվտանգութեան խորհուրդի արտակարգ նիստը Ֆրանսայի նախագահութեան խնդրանքով.

Ֆրանսան խստօրէն կը դատապարտէ Ատրպէյճանի նոր ռազմական յարձակումը, որ իրականացուած է 2022 թուականի Օգոստոսի սկիզբը Հայաստանը Լեռնային Ղարաբաղի մայրաքաղաք Ստեփանակերտին հետ կապող Լաչինի միջանցքին վրայ, որ կրկնուած է 2022 թուականի Սեպտեմբերի 13-ին եւ 14-ին Հայաստանի Հանրապետութեան տարածքի հարաւային եւ հարաւ-արեւելեան շրջաններուն մէջ՝ խախտելով անոր ինքնիշխանութիւնը, միջազգային պայմանագիրները եւ Միացեալ ազգերու կազմակերպութեան կանոնադրութիւնը՝

Կոչ կ’ուղղէ ատրպէյճանական ուժերուն եւ անոնց դաշնակիցներուն անյապաղ եւ անվերապահ դուրս բերել  իրենց ուժերը Հայաստանի ինքնիշխան տարածքէն եւ Լաչինի միջանցքէն ու վերադառնալ  իրենց ելման դիրքեր, որոնց անվտանգութիւնն ու մշտական ​​կարգավիճակը պէտք է ապահովուի 2020թ Նոյեմբերի 9-ի հրադադարի համաձայնագիրի պայմաններուն համապատասխան։

Կոչ կ’ուղղէ Ատրպէյճանի իշխանութիւններուն եւ անոնց բոլոր գործընկերներուն, մասնաւորապէս Թուրքիոյ, յետագային յարգել Հայաստանի տարածքային ամբողջականութիւնը, ինքնիշխանութիւնն ու անկախութիւնը՝ իրենց միջազգային պարտաւորութիւններուն եւ պարտականութիւններուն համապատասխան։

Կոչ կ’ուղղէ ազատ արձակել բոլոր հայ ռազմագերիները եւ ապահովել անոնց վերադարձը հայրենիք.

Կը դատապարտէ Ատրպէյճանի կողմէ 1969 թուականի Յունուարի 4-ի Ցեղական խտրականութեան բոլոր ձեւերու վերացման մասին միջազգային համաձայնագիրի խախտումները եւ կոչ կ’ուղղէ Ատրպէյճանի իշխանութիւններուն կատարել միջազգային պայմանագիրներն ու համաձայնագիրները, որոնք ուղղուած են հայ բնակչութեան անվտանգութեան եւ անոնց խաղաղութեան ու ազատութեան պայմաններու մէջ ապրելու իրաւունքի ապահովման, եւ   տեղահանուած բնակչութեան վերադարձի իրաւունքը, ինչպէս նաեւ հայկական մշակութային ու կրօնական ժառանգութեան պահպանումը.

Կոչ կ’ուղղէ կառավարութեան վճռականօրէն աշխատիլ, որպէսզի ՄԱԿ-ի Անվտանգութեան խորհուրդը Հայաստանի Հանրապետութեան ինքնիշխան տարածքին դէմ Ատրպէյճանի յարձակումը փոխանցէ Միջազգային քրէական դատարան՝ ներառեալ զանգուածային ու ռազմական յանցագործութիւններու հետաքննութիւնը.

Կոչ կ’ուղղէ կառավարութեան վերացնել այս նոր յարձակումներու բոլոր դիւանագիտական ​​եւ տնտեսական հետեւանքները եւ եւրոպացի գործընկերներուն հետ միասին դիտարկել ամէնէն ուժեղ համապատասխան միջոցները՝ ներառեալ Ատրպէյճանի ղեկավարութեան դրամական միջոցներու բռնագրաւումը եւ Ատպէյճանէն կազի ու նաւթի ներմուծման շրջափակումը՝ թոյլ չտալով ատրպէյճանական ուժերուն կողմէ Հայաստանի Հանրապետութեան տարածքին իր ինքնիշխանութեան խախտմամբ իրականացուող ռազմական յարձակումը։

Կ’առաջարկէ Կառավարութեան վերանայիլ  Լեռնային Ղարաբաղի մէջ մարդասիրական գրասենեակ հիմնելու հարցը.

Կառավարութեան կ’առաջարկէ  բոլոր միջոցներով ցուցաբերել Ֆրանսայի աջակցութիւնը Հայաստանին, մասնաւորապէս՝ դիտարկելով Հայաստանի պաշտպանունակութեան ամրապնդման հարցը՝ անոր տարածքային ամբողջականութիւնն ապահովելու նպատակով.

Կ’առաջարկէ  կառավարութեան անյապաղ ձեռնարկել որեւէ նախաձեռնութիւն, որ պիտի երաշխաւորէ հայ բնակչութեան եւ Հայաստանի անվտանգութիւնը՝  միջազգայնօրէն ճանչցուած սահմաններուն մէջ, եւ այդ նպատակով խնդրել միջազգային հանրութեան հովանիի ներքոյ միջդիրքային ուժեր տեղակայել.

Կը վերահաստատէ Լեռնային Ղարաբաղի Հանրապետութիւնը ճանչնալու եւ այդ ճանաչումը որպէս բանակցութիւններու գործիք օգտագործելու անհրաժեշտութիւնը՝ կայուն խաղաղութիւն հաստատելու համար. 

Կոչ կ’ուղղէ կառավարութեան դիմել հնարաւոր քայլերու՝ դիւանագիտական ​​ուղիներով ապահովելու համար Ատրպէյճանի հրատապ եւ խաղաղ մասնակցութիւնը բանակցութիւններու գործընթացին՝ Հարաւային Կովկասի մէջ կայուն խաղաղութեան հասնելու համար։ Բանաձեւն ընդունուեցաւ 285 կողմ ձայներով  1-ի  դէմ ։

Արեւմտեան Հայաստանը կը ցաւի, որ Հայերու դէմ իրագործուած Ցեղասպանութեան հետեւանքով ,ողջ հայ ժողովուրդի իրաւունքներու հարցը հաշուի չէ առնուած, սակայն շնորհակալութիւն կը յայտնէ բոլոր սենատորներուն, որոնք կողմ քուէարկած են այս բանաձեւին, ինչպէս նաեւ սենատոր Պրիճիթ Տեւեզային ՝Պուշ-տյու-Ռոնէն, Պրունօ Ռեթալոնին՝ Վանտէի սենատոր, Սենատի հանրապետական ​​խումբի նախագահ, բանաձեւի խօսնակ, Փիեռ Շարրոնին, սենատոր Փարիզէն, Վալերի Պուայէնին ՝ սենատոր Պուշ-տյու-Ռոնէն, Ֆրանսուա Փաթրիաթին, Սենատի Վերածնունդի խումբի նախագահ, Ժիլպեր-Լիուք Տեւինազին՝ Ռոն նահանգի սենատոր եւ Սենատին մէջ Ֆրանսա-Հայաստան բարեկամութեան խումբի նախագահ, եւ Քրիստիան Քամպոնին, տիկին Էլիան Ասասսին, պարոնայք Փաթրիկ Քաններին, Էրուէ Մարսելին՝ Հայաստանին աջակցելու գործին մէջ իրենց ներդրման համար:

Leave a Reply