Արեւմտեան Հայաստանի մէջ երաշտի պատճառով ցամքող շարք մը ջրամբարներու  եւ լիճերու մէջ ի յայտ եկած կամ մասամբ տեսանելի դարձած պատմական կառոյցներու թիւին  աւելցած է եւս մէկը։

Սամոսատ գաւառին մէջ գտնուող ջրամբարի ջուրերը նուազելուն հետեւանքով ի յայտ եկած է հռոմէական ժամանակաշրջանի բնակավայր։ Ձկնորսները, նկատելով   անսովոր կառոյցի մնացորդներ, զեկուցած են Սամոսատի թանգարանի տնօրինութեան, որուն հիման վրայ հնէաբաններն ուսումնասիրութիւն կատարած են տարածքին մէջ։ Ուսումնասիրութեան ընթացքին անոնք յայտնաբերած են նախնադարեան շրջանի դամբարան, կոտրուած ամաններ, կացիններ եւ սուր,  կտրող գործիքներ: