Վերջին օրերուն արցախա-ատրպէյճանական շփման գիծի ողջ երկայնքով Ատրպէյճան աշխոյժ կերպով կը գործադրէ բոլոր ջանքերը՝ խաղաղ բնակչութիւնը ահաբեկելու, մարդոց կեանքի «բնականոն» ընթացքը խաթարելու նպատակով: Հրաձգային տարբեր զինատեսակներէ թիրախային կրակոցներ կ’արձակուին նաեւ գիւղատնտեսական աշխատանքներ կատարող անձերու ուղղութեամբ:

Ատրպէյճանական կողմը այս անգամ կրակ բացած է Մարտունի շրջանի Հացի գիւղի վարչական տարածքին գիւղատնտեսական աշխատանքներ կատարող անձերու ուղղութեամբ, վնասած տեխնիկան։ 

Բոլոր յանցաւոր դէպքերը կ’արձանագրուին եւ կը փաստագրուին Արցախի Հանրապետութեան իրաւապահ մարմիններուն կողմէ՝  քրէական դատավարութեան օրէնսդրութեամբ սահմանուած կարգով:

Արցախի Հանրապետութեան դատախազութեան կողմէ նշուած դէպքերուն մասին անմիջապէս կը հաղորդուի Արցախի մէջ խաղաղապահ առաքելութիւն իրականացնող զօրակազմի դատախազին, իւրաքանչիւր պարագայի կոչ կ’ուղղուի ատրպէյճանական կողմին հաւատարիմ մնալ Ռուսիոյ, Հայաստանի ու Ատրպէյճանի Հանրապետութիւններու գլխաւոր դատախազներուն միջեւ ձեռք բերուած պայմանաւորուածութեան եւ պատշաճ քննութիւն իրականացնել։

Արեւմտեան Հայաստանը խստօրէն կը դատապարտէ վերջին օրերուն Ատրպէյճանի կողմէ իրականացուող յարձակումն ու կը հրաւիրէ միջազգային հանրութեան ուշադրութիւնը այս փաստին վրայ։ Այն, ինչին ականատես կ’ըլլան իրենց բնիկ տարածքներուն մէջ ապրող  խաղաղ բնակիչները, պարզապէս անթուլատրելի է։

Leave a Reply