Լէոնիտ Ազգալդեան ծնած է 1942 թուականի Նոյեմբերի 22-ին Թիֆլիս։ 1960 թուականին ընդունուած է Մոսկուայի Լոմոնոսովի անուան համալսարանի ֆիզիկայի բաժին, ուրկէ յետագային տեղափոխուած է Երեւանի պետական համալսարան  եւ այն  աւարտած է ռատիօ-ֆիզիկա մասնագիտութեամբ։ Աշխատած է ժողովրդական տնտեսութեան տարբեր բնագաւառներու մէջ:

Արցախեան շարժման սկզբնաւորման օրէն Լէոնիտ Ազգալդեան, որպէս ռազմական առաջատար գործիչ, աշխոյժ կերպով մասնակցած է հայ ազգային-ազատագրական պայքարին։ 1990 թուականի Փետրուարէն վարած է «Անկախութեան բանակ» ռազմաքաղաքական կառոյցի հրամանատարութիւնը։ Ան կազմակերպած եւ ղեկավարած է Հայաստանի  շարք մը շրջաններու ինքնապաշտպանական մարտերը։

Ազգալդեան յետագային իր ճակատագիրն ամբողջութեամբ կապած է Արցախի ազատամարտին հետ՝ սկիզբը գործելով Շահումեանի, այնուհետեւ՝ Մարտակերտի շրջաններուն մէջ։ 1991 թուականի Յունիսին Յովսէփ Յովսէփեանին հետ ան ստեղծած է «Ազատագրական բանակ» ռազմական կազմակերպութիւնը, որուն գլխաւոր հրամանատարը մնաց մինչեւ իր կեանքին վերջը։ Յիշեցնենք, որ «Ազատագրական բանակ»ի՝ արցախեան ազատամարտի աշխոյժ մասնակիցներէն էր Արեւմտեան Հայաստանի նախագահ Արմենակ Աբրահամեան։

Լէոնիտ Ազգալդեան 1992 թուականի Յունիսի 21-ին Մարտակերտ շրջանին մէջ՝ Տօնաշէն գիւղին մօտ թշնամիի դաւադիր կրակոցներուն զոհ դարձաւ։

Leave a Reply