Հայաստանի Հանրապետութեան մէջ Արցախի Հանրապետութեան մշտական ներկայացուցչութեան  խումբ մը գիտական մտաւորականներու նախաձեռնութեամբ Նոյեմբերի 19-ին կազմակերպուած է «Արցախի Հանրապետութեան կայացման օրինականութիւնը եւ անոր հանդէպ Ատրպէյճանի Հանրապետութեան տարածքային հաւակնութիւններու ոչ իրաւաչափութիւնը» խորագիրը կրող քննարկում, որուն մասնակցած են գիտակրթական ոլորտի շարք մը մասնագէտներ։ Քննարկման կազմակերպման նպատակն է Արցախեան հիմնախնդիրին վերաբերող իրաւական փաստաթուղթերու հիման վրայ ցոյց տալ, որ Արցախի Հանրապետութեան կայացումը օրինական է, իսկ Արցախի հանդէպ Ատրպէյճանի տարածքային հաւակնութիւնները զուրկ են իրաւական հիմքէ եւ այն ապացուցող փաստարկները պէտք է ներկայացուին միջազգային բոլոր հարթակներու վրայ։

Քննարկումը վարած է նախաձեռնող խումբի անդամ, ֆիզիկա-ուսողական գիտութիւններու դոկտոր, փրոֆեսոր Վանիա Բարսեղեան: Հիմնական զեկուցումներով հանդէս եկած են ԳԱԱ թղթակից անդամ Ալեքսանտր Մանասեան եւ սահմանադրագէտ Վարդան Պօղոսեան։

Արեւմտեան Հայաստանը կը յիշեցնէ, որ Արցախի սահմանները որոշուած են Սեւրի դաշնագիրով, քանի որ այն կը հանդիսանայ միացեալ Հայաստանի անքակտելի մաս։ Որեւէ օրակարգ, ուր կը քննարկուի առանձին հանրապետութիւններու ճանաչում կամ առանձնացում, դուրս է միացեալ Հայստանի օրակարգային խնդիրէն եւ չի կրնար ներկայացնել ընդհանուր հայութեան պահանջները։ Արեւմտեան Հայաստանը կը պաշտպանէ ողջ հայութեան իրաւունքները՝ բնիկութեան եւ միջազգայնօրէն ճանչցուած տարածքներու հիման վրայ։

Leave a Reply