Իրաւունքի եւ արդարութեան կեդրոն «Թաթոյեան» հիմնադրամի տնօրէն Արման Թաթոյեան Նոյեմբերի 22-ին ընդունած է Հայաստանի մէջ Արժանթինի արտակարգ եւ լիազօր դեսպան Մարիանօ Վերկարան։ Հանդիպման ընթացքին Արման Թաթոյեան ներկայացուցած է հիմնադրամի գործունէութեան ուղղութիւնները, ինչպիսիք են Հայաստանի մէջ ժողովրդավարութեան եւ իրաւունքի գերակայութեան ամրապնդումը, հասարակութեան մէջ փոխադարձ յարգանքի, բազմակարծութեան եւ հանրային համերաշխութեան ապահովումը, Հայաստանի եւ Հայկական սփիւռքին միջեւ կապերու ապահովումը եւ այլն։ Արման Թաթոյեան դեսպանին ներկայացուցած է ատրպէյճանական յանցաւոր արարքներուն` զինուած ներխուժումներուն եւ անօրինական տեղակայումներուն հետեւանքով Հայաստանի սահմանային բնակիչներու իրաւունքներու խախտումները՝ յստակ օրինակներով ու փաստերով։ Բացի անկէ, շեշտուած է անցեալի արդիւնաւէտ համագործակցութիւնը Արժանթինի դեսպանութեան հետ մարդու իրաւունքներու պաշտպանութեան տարբեր հարցերու մէջ: Դեսպանը կարեւորած է փոխադարձ համագործակցութիւնը եւ կողմերն իրենց պատրաստակամութիւնը յայտնած են ամրապնդելու եւ ընդլայնելու յետագայ հնարաւոր համագործակցութիւնը շարք մը ոլորտներու մէջ:

Leave a Reply