Ախալքալաք շրջանի Օրճա գիւղին մէջ այս տարի «Օգնութիւն գիւղին» նախագիծի ծիրին մէջ որոշած են երիտասարդներու համար զբաղմունքի կեդրոն կառուցել։ Շէնքն արդէն պատրաստ է, կը մնայ կահաւորել մարզական սարքաւորումներով։

Գիւղի հին դպրոցի շէնքին մէկ հատուածը, որ արդէն երկար տարիներ չէր գործեր եւ կը գտնուէր անմխիթար վիճակի մէջ, վերանորոգած են, ամրացուցած յատակն ու կտուրը։ Սակայն գումարը բաւարար չէ եղած, որպէսզի այս տարի շէնքը կահաւորեն համապատասխան մարզական սարքաւորումներով: 

«Մենք բոլորով որոշեցինք, որ գիւղի երիտասարդներու զբաղմունքին համար կեդրոն բանանք։ Մենք մեծ յոյս ունինք, որ յաջորդ տարի նահանգապետարանը պիտի օգնէ մարզական սարքաւորումներ ձեռք բերելու համար», – ըսած է գիւղի մասնագէտ Ռոպերթ Արեւեան։

Ախալքալաքի քաղաքապետ Մելքոն Մակարեան նշած է, որ անձամբ այցելած է գիւղը, հանդիպած գիւղացիներուն հետ եւ կը վստահեցնէ, որ յաջորդ տարի նախագիծը աւարտին պիտի հասցուի:

Leave a Reply