Ցեղասպանութեան կանխարգելման Լեմկինի հիմնարկը «Ցեղասպանութեան մէջ «խաղաղութիւն» կամ «բարեկեցութիւն» գոյութիւն չունի» խորագիրով յայտարարութիւն տարածած է, ուր նշած է, որ հիմնարկը կանգնած է Արցախի Հանրապետութեան ժողովուրդին կողքը, որ Հոկտեմբերի 30-ին Ստեփանակերտի մէջ յայտնած է ինքնորոշման իր կամքը:

«Լեմկինի հիմնարկը իր համերաշխութիւնը կը յայտնէ Արցախի Հանրապետութեան ժողովուրդին, որ բարձրաձայնած է ինքնորոշման իր կամքին մասին: Ատրպէյճան հաւակնութիւններ ունի Արցախի նկատմամբ՝ հակառակ անոր, որ այդ տարածքին մէջ հազարամեակներ շարունակ բնակչութեան մեծամասնութիւնը հայեր եղած են»: Հիմնարկը կը յիշեցնէ, որ ինքնորոշման իրաւունքը միջազգային իրաւական համակարգի հիմնարար իրաւունքներէն մէկն է, եւ Արցախի ժողովուրդն արժանի է, որ միջազգային հանրութիւնը լրջօրէն վերաբերի ինքնորոշման անոնց պահանջներուն:

Ցեղասպանութեան կանխարգելման Լեմկինի հիմնարկը նաեւ կը շեշտէ, որ միջազգային հանրութիւնը պէտք չէ անտեսէ տարածաշրջանին մէջ Հայերու դէմ իրագործուած Ցեղասպանութեան հետեւանքները, որ «Արեւմտեան Հայաստանի մէջ լիովին ոչնչացուց հայկական ներկայութիւնը», ինչպէս նաեւ «հայերու նկատմամբ ատրպէյճանցի ազգայնականներու անզուսպ ցեղասպանական թշնամանքը»: