Ֆրանսական հեղինակաւոր «Ֆիկարօ» պարբերականը իր «Ֆիկարօ – պատմութիւն» ամսագիրի Դեկտեմբերի թիւը նուիրած է հայ ժողովուրդի պատմութեան: Ամսագիրի շապիկին ֆրասահայ յայտնի լուսանկարիչ Անթուան Ակուճեանի հեղինակած լուսանկարն է: Ամսագիրի ամբողջ թիւը վերնագրուած է «Հայաստան. Պատմութեան փորձութեան ենթարկուած ազգ. Ողբերգութիւն եւ յոյս», ուր անդրադարձ կը կատարուի Հայաստանի պատմութեան տարբեր էջերուն՝ հին ժամանակներէն մինչեւ մեր օրեր, ինչպէս նաեւ Լեռնային Ղարաբաղի մէջ Ատրպէյճանի սանձազերծած պատերազմի հետեւանքներուն:

Ամսագիրին մէջ տեղ գտած են տարբեր լուսանկարիչներու տարբեր ժամանակներու գործեր, իսկ բնագրային մասի հեղինակները ինչպէս հայ, այնպէս ալ օտարազգի հեղինակաւոր պատմաբաններ են: