2022 թուականի  Դեկտեմբերի 12-13-ին Երեւանի մէջ տեղի պիտի ունենայ «Ընդդէմ ցեղասպանութեան յանցագործութեան» 4-րդ համաշխարհային գիտաժողովը՝  «Ցեղասպանութեան կանխարգելումը նոր տեխնոլոկիաներու դարաշրջանին» խորագիրով:

ՀՀ Արտաքին գործոց փոխնախարար  Վահէ Գէորգեան նշած է, որ գիտաժողովին  պիտի մասնակցին շատ հեղինակաւոր, այս ասպարէզին մէջ խօսք ունեցող անհատներ: Մասնակիցներու թիւը պիտի հասնի մօտ 250-ի, պիտի մասնակցին 30  միջազգային հեղինակաւոր բանախօսներ, գիտնականներ, բարձրաստիճան պաշտօնեաներ, տեխնոլոկիական ընկերութիւններու ներկայացուցիչներ:

«Պատմութենէն լաւ գիտենք, որ միջազգային անվտանգութեան համակարգի փլուզումը մշտապէս կը յանգեցնէ մարդկութեան դէմ յանցագործութիւններու եւ այլ զանգուածային  վայրագութիւններու, եւ այս բնաբանին ներքոյ կայացնել գիտաժողով  եւ հրաւիրել ցեղասպանութեան կանխարգելման գործին մէջ ներգրաւուած շրջանակներ, ինքնին կարեւոր է»,- նշած է փոխնախարարը։ 

Անոր խօսքով, ցեղասպանութեան իրականացումը երբեք ալ դիւրին գործ չէ եղած. այն պահանջած է երկարատեւ ցեղասպան գաղափարի քարոզ հասարակութեան տարբեր շերտերու մէջ, այն պահանջած է հսկայական ծաւալի մարդոց կազմակերպուած սպանութիւն, եւ այդ տեսակէտէն ցեղասպանութիւններու էջը կը բացուի 20-րդ դարէն եւ հայերու դէմ իրականացուած ցեղասպանութիւնը  առաջիններէն է: