Արեւմտեան Հայաստանի Տերսիմ նահանգը հարուստ է պատմամշակութային կառոյցներով։ Այս տարածքին մէջ գտնուող Փուլումուր հովիտին մէջ բոլորովին պատահաբար  յայտնաբերուած է հնամենի միակամար, քարէ կամուրջ՝ կիսաւեր վիճակով։ Քաղաքացի մը, որ վերջերս պատահաբար տեսած է կամուրջը եւ մօտիկէն զննած այն եւ տեղեակ պահած է Տերսիմի թանգարանի  ղեկավարութեան, որոնք   եկած եւ ուսումնասիրած են։ Ըստ նախնական գնահատականներու՝ այն կը պատկանի հռոմէական ժամանակաշրջանին։ Ուսումնասիրութենէն ետք պատմական կամուրջը պիտի գրանցուի  եւ պահպանութեան տակ վերցուի։

Դարերէ անցած կամուրջը վնասուած է նաեւ գանձախոյզներու կողմէ։ Կամուրջին տակ մօտ 2մ խորութեամբ փոս  փորուած է։

Ըստ շրջանառուող առասպելին, երիտասարդ կին մը իր հետ ամուսանանալ ցանկացող տղային հետ 7 կամուրջ կառուցելու պայման կը կապէ՝ Բերդակ գիւղէն մինչեւ Փուլումուր։ Տղան, սարերէն պոկելով մեծ քարեր, կը կառուցէ այս կամուրջը։ Ի վերջոյ, անոնք չեն ամուսնանար։