2022 թուականի Նոյեմբերի 28-ին «Նիւ Եորք թայմս» թերթը հրապարակած է լրագրող Կոնստանտ Մեհիոյի ցնցող յօդուածը՝ «Փարիզի թանգարանն ունի 18 հազար գանկ. դժուար է ըսել, թէ անոնք որու են» վերնագիրով։ 

Գանկերէն հինգը կը պատկանին Հայերու դէմ իրագործուած Ցեղասպանութեան զոհերուն։  Կոնստանտ Մեհիօ կը տեղեկացնէ, որ անոնք կիներու գանկեր են, որոնք ֆրանսացի նախապատմութեան մասնագէտ Էմանուէլ Փասեմար հաւաքած էր Սուրիոյ մէջ իր հետազօտութիւններու ժամանակ 1925-1926 թուականներուն:

Թանգարանը չէ հրապարակած 18 հազար գանկի ինքնութիւնը՝ վախնալով փոխհատուցման հայցերէն:

Այս առիթով սենատոր Փիեռ Ուզուլիաս նշած է. «Ես ընկճուած էի երբ իմացայ, որ Տէր Զօրի մէջ (Սուրիա) յայտնաբերուած Հայերու ցեղասպանութեան զոհերուն պատկանող  հինգ հայկական գանկեր տակաւին կը գտնուին Մարդու թանգարանի հաւաքածուներուն մէջ։  Այժմ կ’առաջարկեմ Հայաստանի կառավարութեան այս գանկերը Հայաստան վերադարձնել, որպէսզի անոնք իրենց հանգրուանը գտնեն Երեւանի մէջ Հայերու դէմ իրագործուած Ցեղասպանութեան յուշահամալիրի մերձակայքը։ Այս զոհերն արժանի են պատշաճ յուղարկաւորութեան՝ մէկ դար ֆրանսական թանգարանի նկուղի արկղերուն մէջ պահուելէ ետք»։