«Թրքականութիւն վիրաւորելու» մեղադրանքով Անգարայի գլխաւոր դատախազութիւնը դատական ​​հայց ներկայացուցած է Ժողովուրդներու ժողովրդավարական կուսակցութեան նախկին 11 անդամներուն դէմ՝ պահանջելով զանոնք դատապարտել քրէական օրէնսգիրքի 301-րդ յօդուածին համաձայն։ Դատական հայցը  հիմնուած է 2021 թուականի Ապրիլի 24-ին անոնց կողմէ կատարուած յայտարարութեան, ուր քաղաքական գործիչները Հայերու դէմ իրագործուած ցեղասպանութեան վերաբերեալ յստակ դիրքորոշում ցուցաբերած են։ 

Մեղադրական եզրակացութեան մէջ մեջբերուած է քաղաքական գործիչներու կողմէ կատարուած յայտարարութիւնը. «1915 թուականի Ապրիլի 24-ին Միութիւն եւ յառաջդիմութիւն կոմիտէի յատուկ կազմակերպութեան կողմէ բռնի աքսորուեցան եւ սպանուեցան 250 հայ մտաւորականներ եւ քաղաքական գործիչներ։ Հայ ժողովուրդը ցեղասպանուած  եւ աքսորուած է իր սեփական հայրենիքէն, ուր ապրած է հազարամեակներ շարունակ։ Այնուհետեւ Արեւմտեան Հայաստանը ապաքրիստոնէացուեցաւ։ Ցեղասպանութեան արդըւնքով անոնց ունեցուածքն ու մշակութային արժէքները բռնագրաւուեցան։ Թուրքիա 106 տարի չէ առերեսուած Հայերու Ցեղասպանութեան հետ, որուն պատճառով  յանցագործութիւնը կրկնուեցաւ եւ հասաւ մինչեւ մեր օրերը։       Խոշոր յանցագործութիւնը մնաց անպատիժ, խտրականութիւնն ու ատելութեան դրսեւորումները դարձան սովորական: Հայերու ցեղասպանութիւնը նախ եւ առաջ խնդիր մըն է, որուն այսօր պէտք է  արդարացիօրէն առերեսուիլ եւ ընդունիլ՝ մարդասիրական, իրաւական եւ ընկերական առումներով: Հայերու Ցեղասպանութիւնը տեղի ունեցած է Արեւմտեան Հայաստանի տարածքին եւ արդարութիւնը պէտք է ապահովուի այս հողերուն մէջ»։