Արցախի տեղեկատուական շտաբը կը յայտնէ, որ սոյն թուականի Դեկտեմբերի 10-ին, ատրպէյճանական կողմը, հիմք ընդունելով Արցախի Հանրապետութեան մէջ տեղակայուած՝ Ռուսիոյ խաղաղապահ զօրակազմի հրամանատարութեան նախապէս ուղղուած՝ Մարտակերտ շրջանի հանքավայրերուն մէջ դիտարկում իրականացնելու գրութիւնը, կը ծրագրէր իրականացնել այցելութիւն Դրմբոնի եւ Կաշէնի հանքավայրեր։ «Խաղաղապահ զօրակազմի հրամանատարութեան կողմէ, համաձայն իրենց վերադաս մարմիններու հրահանգին, թուլատրուած է միանգամեայ տեսողական այց վերը նշուած հանքավայրեր։

Հաշուի առնելով, որ առաջարկուած ծրագիրը, սահմանուած կարգով, համաձայնեցուած չէ եղած Արցախի Հանրապետութեան իշխանութիւններուն եւ հանքավայրերը շահագործող կազմակերպութեան հետ՝  հանքարդիւնաբերական կազմակերպութեան աշխատակիցներուն եւ յարակից համայնքներու բնակիչներուն կողմէ ինքնաբուխ կերպով արգելափակուած է վերը նշուած խումբին մուտքը հանքավայրերու տարածք։Ստեղծուած իրավիճակը հանգուցալուծելու նպատակով հաւաքներու վայրեր մեկնած են Արցախի Հանրապետութեան իշխանութիւններու ներկայացուցիչներ, որոնց կողմէ տարուած բանակցութիւններուն արդիւնքով որոշում ընդունուած է դադրեցնել հանքավայրերուն մէջ նախատեսուած շրջայցը եւ այդ հարցին անդրադառնալ լրացուցիչ քննարկումներէ ետք»,- նշուած է հաղորդագրութեան մէջ։