ԱՄՆ Արտաքին գործոց նախարարութեան խօսնակ Նէտ Փրայս լրագրողներու հետ ամէնօրեայ ասուլիսի ընթացքին պատասխանած է հարցին, թէ արդեօք Ուաշինկթըն կը հետեւի՞ Լաչինի միջանցքի տարածքին ստեղծուած իրավիճակին եւ Ռուսիոյ նախագահ Փութինի այս հարցին շուրջ ունեցած վերջին զրոյցներուն հայկական եւ ատրպէյճանական կողմերուն հետ:

«Մենք հետեւողականօրէն կեդրոնացած ենք այս մարտահրաւէրին, լարուածութեան նուազեցման, կայուն, համապարփակ կարգաւորման ճանապարհին այս երկու երկիրները կանգնեցնելու անհրաժեշտութեան վրայ: Մենք այստեղ՝ Ուաշինկթընի մէջ կազմակերպեցինք այս երկու երկիրներու հանդիպումն Արտաքին գործոց նախարարներու մակարդակով: Նոյնը նաեւ Նիւ Եորքի մէջ՝ ՄԱԿ-ի Գլխաւոր վեհաժողովի ծիրին մէջ: Բացի անկէ, մեր աւագ խորհրդական Ֆիլիփ Ռիքըր աշխոյժ կերպով ներգրաւուած է երկխօսութեան մէջ երկու երկիրներու պաշտօնեաներուն հետ՝ համոզուած ըլլալու համար, որ մենք ամէն ջանք ի գործ կը դնենք, եւ ամենակարեւորը, որ այս երկու երկիրներն ամէն ջանք կը գործադրեն, որպէսզի այդ լարուածութիւնը նուազի»,- ըսած է Նէտ Փրայս: