Բարձր դասարանի աշակերտներու եւ ուսանողներու համար Հայաստանի մէջ Հայերու Ցեղասպանութեան պատմութեան նոր դասընթացք մշակած են։ Շուտով այն պիտի ներկայացուի Կրթութեան, գիտութեան, մշակոյթի եւ մարմնակրթութեան նախարարութեան քննարկման։ Այս լուրը յայտնեց Հայերու Ցեղասպանութեան թանգարանի տնօրէն Յարութիւն Մարութեան։ Դասաւանդման նոր ռազմավարութիւնը ներկայացուած է Հայերու Ցեղասպանութեան թանգարանին մէջ՝ «Հայերու Ցեղասպանութեան դասաւանդման մարտահրաւէրները 21-րդ դարուն» գիտաժողովի ծիրին մէջ։ Գիտաժողովին մասնակցած են Հայաստանի, ԱՄՆ–ի, Սպանիոյ, Ռուանտայի, Քամպոտիաայի, Լիպիայի եւ Իսրայէլի ներկայացուցիչները, շուրջ 30 զեկոյց ընթերցուած է։

«Շատ կարեւոր է, որ Հայերու Ցեղասպանութեան մասին գիտելիքները միայն խորհրդանշական բնոյթ չկրեն։ Այս հարցը պէտք է խոր ուսումնասիրուի, որպէսզի ազդէ աշխարհընկալման վրայ», – ըսած է Մարութեան։

Անոր խօսքով, Հայերու Ցեղասպանութեան հարցը անհրաժեշտ է մշտապէս բարձրաձայնել, լուսաբանել, խօսիլ անոր, անոր հետեւանքներուն, ինչպէս նաեւ ապագային կրկնուելու հաւանականութեան մասին։

Արեւմտեան Հայաստանը կը ցաւի, որ իր կառավարութենէն ոչ մէկ փորձագէտ հրաւիրուած է այս համաժողովին, եւ կը նշէ, որ համաժողովը չէ անդրադարձած Արեւմտեան Հայաստանի տարածքին Հայոց Ցեղասպանութեան կիրառման պայմաններուն եւ անկէ բխող հատուցման իրաւունքներուն, որոնք որոշուած են Դաշնակիցներու եւ Միութեան կողմէն։