Արցախ ինքնուրոյն չի կրնար դիմակայել այս մարտահրաւէրը եւ այստեղ պէտք է գործեն միջազգային նորմերը, «Ազատութիւն» ռատիօ-կայանին հետ զրոյցի ժամանակ յայտնած է Արցախի մարդու իրաւունքներու նախկին պաշտպան, Արցախի պետական նախարարի խորհրդական Արտակ Բեգլարեան, որ այս օրերուն անժամկէտ նստացոյց կ’իրականացնէ Երեւանի մէջ՝ ՄԱԿ-ի գրասենեակին դիմաց՝ ակնկալելով միջազգային երկարաժամկէտ երաշխիքներ Արցախի անվտանգութեան համար։ 

Ընդգծելով, որ Արցախի ու Ատրպէյճանի միջեւ սպառազինութիւններու եւ ուժային անհաւասարութիւն կայ, Բեգլարեան նշած է. «Միջազգային նորմերը անոր համար են, որ ուժեղներէն եւ յանցագործներէն թոյլերը պաշտպանեն՝ յստակ արդարացի սկզբունքներու հիման վրայ։ Մենք ոչ թէ կը խնդրենք միջազգային հանրութեան, որ մեզ պաշտպանեն, այլ մենք կը պահանջենք միջազգային հանրութեան, որ յստակօրէն իրենց պատասխանատւութիւնը կատարեն, սա նոյն իրենց ընդունած փաստաթուղթերով  արձանագրուած, ամրագրուած է։ Ակնյայտ է, որ Ատրպէյճան ոչ թէ եռակողմ յայտարարութիւնը կը խախտէ, այլ Ատրպէյճան, առաջին հերթին, կը խախատէ մարդու իրաւունքներու միջազգային իրաւունքը եւ մարդասիրական միջազգային իրաւունքը»։

Արցախ կը համարուի Արեւմտեան Հայաստանի անբաժանաելի մաս, եւ Արեւմտեան Հայաստանը խորապէս անհանգստացած է տեղի ունեցող իրադարձութիւններով։ Այո՛ միջազգային նորմերը պէտք է գործեն այստեղ, իսկ բռնազաւթիչ Ատրպէյճանի նկատմամբ պէտք է պատժամիջոցներ կիրառուին նաեւ այս դէպքով, բայց Արեւելեան Հայաստանը նոյնպէս պէտք է ստանձնէ իր պարտականութիւնները արցախահայութեան նկատմամբ, պաշտպանէ զանոնք եւ ողջ տարածքը։ Անվտանգութեան առումով ոչինչ ձեռնարկելով Երեւանի իշխանութիւններուն որոշումը շատ լուրջ հետեւանքներ կը ձգէ հայ բնակչութեան առօրեային վրայ։