Արարատեան թագաւորութեան ժամանակաշրջանին Վանի մէջ կառուցուած Քեորզութ ամրոցի վայրին մէջ այս տարի սկսած պեղումներու ժամանակ յայտնաբերուած են եւս մէկ   տաճար եւ դամբարան։  Գտածոներու թուին եղած են նաեւ խեցեղէնի բեկորներ եւ մետաղական իրեր։ 

Պեղումներն իրականացուած են Վանի Հարիւրամեակ համալսարանի գրականութեան ճիւղի հնագիտութեան բաժնի դոկտոր Սապահաթթին Էրտողանի գիտական խորհրդատւութեամբ, Մուրատիէ շրջանի նահանգապետարանին եւ քաղաքապետարանին աջակցութեամբ։ Եղանակային պայմաններու պատճառով պեղումները պիտի շարունակուին յաջորդ տարի։  Սապահաթթին Էրտողանի խօսքով, երկրորդ տաճարը յայտնաբերուած է այն տարածքին մէջ, ուր աւելի շուտ յայտնաբերուած էր ուրիշ տաճար մը։

«Կը կարծենք, որ նոր յայտնաբերուած տաճարը կառուցած է Մենուա թագաւորը, որուն անմիջապէս կողքը հանդիպեցանք  դամբարանի մը, որուն տարածքին մէջ մեծ քանակի ուրարտական շրջանի ​​խեցեղէն կայ։ Այս դամբարանը կարեւոր է նաեւ գտածոներու բազմազանութեամբ։ Անոնց թուին են մետաղեայ իրեր, մահացած մարդոց պատկանող անձնական իրեր, ինչպէս նաեւ խեցեղէն առարկաներ»,- նշած է ան: