«Միջազգային քրիստոնեական համերաշխութիւն» կազմակերպութիւնը 8 այլ կազմակերպութիւններու հետ միասին նախազգուշացուցած է Արցախի մէջ ցեղասպանութեան վտանգի մասին։ Կազմակերպութիւնները Ցեղասպանութեան յանցագործութիւնը կանխելու եւ անոր համար պատիժի մասին համաձայնագիրին միացած երկիրներուն կոչ ուղղած են գործել ՄԱԿ-ի Անվտանգութեան խորհուրդին միջոցով՝ կանխելու հայերու ցեղասպանութիւնը տարածաշրջանին մէջ։ 

Կազմակերպութեան տարածած յայտարարութեան մէջ նշուած է․ «Ցեղասպանութեան կանխարգելման մասին ՄԱԿ-ի գլխաւոր քարտուղարի գրասենեակին կողմէ սահմանուած վայրագ յանցագործութեան վտանգին բոլոր 14 գործօններն առկայ են։ Արցախի հայերուն դէմ ատրպէյճանական ներկայ յարձակման կը համապատասխանէ Ատրպէյճանի կառավարութեան, Թուրքիոյ Հանրապետութեան, Օսմանեան կայսրութեան եւ անոնց համախոհներուն կողմէ հայերուն եւ տարածաշրջանի քրիստոնէական այլ համայնքներուն դէմ իրականացուած ցեղային եւ կրօնական զտումներու վաղեմի քաղաքականութեան»։

Այն ինչ որ այսօր տեղի կ’ունենայ Արցախի մէջ, Արեւմտեան Հայաստանի մէջ՝ հայերու դէմ իրագործուած Ցեղասպանութեան շարունակութիւնն է, եւ  միջազգային հանրութեան անտարբերութեան հետեւանքը։ Եթէ դատապարտուէր եւ հատուցում ունենար հայերու դէմ իրագործուած Ցեղասպանութիւնը, այսօր թուրք-ատրպէյճանական դաշինքը երկրորդ ցեղասպանութիւնը չէր փորձեր կազմակերպել Արցախի մէջ։ Այս միջազգային հանրութեան եւ շարք մը գերտէրութիւններու պատասխանատւութեան թերացումն է։