Ուշ միջնադարու հայ խոշորագոյն բանաստեղծ, աշուղ Սայեաթ-Նովայի 300-ամեակին առթիւ Հայաստանի Հանրապետութեան ազգային գրադարանին մէջ բացուած է անոր գրական ժառանգութեան նուիրուած ցուցահանդէս, ուր ընդգրկուած են շուրջ 110 միաւոր գիրքեր, նոթագրութիւններ: 

Գրականագէտ Սուսաննա Յովհաննիսեան Սայեաթ-Նովայի ու անոր արուեստին մասին այսպէս խօսած է․ «Վիթխարի գագաթ է Սայեաթ-Նովա: Անոր արուեստին նշանակութիւնը դուրս է հայ ազգային մշակոյթի սահմաններէն: Համամարդկային են Սայեաթ-Նովայի քնարերգութիւնը, անոր խոհափիլիսոփայական ստեղծագործութիւնները: Ան  յայտնի է իբրեւ մեծ սիրերգու, սակայն անոր գործերուն մէջ հսկայական փիլիսոփայութիւն կայ, որ բոլոր ժամանակներուն արդիական է»:

Յիշեցնենք, որ Սայեաթ-Նովայի իրական անունը Յարութիւն է, իսկ Մականունը՝ Սայադեան: Ան ծնած է 1712 թուականի Յունիսի 14-ին, Թիֆլիս:

Սայեաթ-Նովայի կեանքը աւելի քան 150 տարի եղած է գրականագէտներու, լեզուաբաններու, պատմաբաններու եւ փիլիսոփաներու բանավէճերու առարկան։ Աշուղին մասին տեղեկութիւններու հիմնական աղբիւրներէն են նոյն իր գրած բանաստեղծութիւնները։