Իրաւունքի եւ արդարութեան կեդրոն «Թաթոյեան» հիմնադրամի տնօրէն Արման Թաթոյեան ֆէյսպուքեան իր էջին յայտնած է. «Այսօր այցելած ենք Գեղարքունիք, Արագածոտն եւ Արմաւիր մարզեր` Ատրպէյճանի սանձազերծած 2022թ. Սեպտեմբերի 13-14-ի, 2020թ.  44-օրեայ պատերազմներու ընթացքին զոհուած, անհետ կորսուած զինուորական ծառայողներու ընտանիքներուն, այդ թուին՝ զոհուած կին զինուորական ծառայողի ընտանիքին։ Քննարկած ենք մարդոց խնդիրները, որոնք ալ աւելի խորացած են պատերազմի հետեւանքով։

Առանձնակի ուշադրութեան արժանի է այն փաստը, որ 2022թ. Սեպտեմբերի 13-14-ի Ատրպէյճանի սանձազերծած պատերազմին հետեւանքով կան զոհուած հայ  զինուորական ծառայողներու մարմիններ, որոնք ՀՀ տարածքի այն հատուածներուն մէջ են, ուր ներխուժած են ատրպէյճանական զինուած ուժերը եւ կը գտնուին անոնց վերահսկողութեան ներքոյ: Զինուորական ծառայողի մարմինը դուրս բերել չի յաջողիր ատրպէյճանական կողմի խոչընդոտներուն պատճառով։ Այս հանգամանքը, բնականաբար, աւելի մեծ ցաւ ու տառապանք կը պատճառէ ընտանիքներուն։

Տեղւոյն վրայ արձանագրուած են շարք մը խնդիրներ, որոնց լուծման կամ անոնց նպաստելու ուղղութեամբ հիմնադրամը քայլեր պիտի ձեռնարկէ, ըստ անհրաժեշտութեան տրուած են իրաւաբանական խորհրդատւութիւն եւ ուղղորդումներ»։

Արեւմտեան Հայաստանը տարբեր ամպիոններէ բարձր մակարդակով կը հնչեցնէ այս խնդիրները, որոնք օրհասկան են եւ կը պահանջեն համակարգուած լուծումներ: