Ատրպէյճան թոյլ չի տար վերականգնողական աշխատանքներ իրականացնել այն հատուածին մէջ, ուր վթարուած է Արցախը Հայաստանէն սնուցող միակ բարձրավոլթ գիծը: 

Աւելի վաղ Արցախի տեղեկատուական շտաբէն յայտնած էին, որ Յունուարի 9-ին` ժամը 14։35-ին, Արցախը Սիւնիք մարզէն սնուցող միակ բարձրավոլթ գիծի  Գորիս-Ստեփանակերտ 33-րդ քմ-ի վրայ արձանագրուած է վթար։ Ըստ սարքաւորումներով արձանագրուած տուեալներուն, վթարը կը գտնուի Աղաւնոյ-Բերձոր հատուածին մէջ։ Որոշում կայացուած է հանրապետութեան ելեկտրամատակարարումը իրականացնել տեղական արտադրող կայաններու միջոցով՝ համապատասխան սահմանափակումներով։ Ելլելով տուեալ իրավիճակէն, Հանրապետութեան մէջ Յունուարի 10-էն կ’իրականացուին հովհարային անջատումներ:

Արեւմտեան Հայաստանը կը նշէ, որ այս մարդասիրական ճգնաժամի պատճառը նաեւ այն է, որ բռնազաւթիչ Ատրպէյճան խախտելով Հայաստան պետութեան տարածքային ամբողջականութիւնը բռնակցուած կը պահէ Բերձորը եւ Աղաւնոն, ուրկէ ալ կ’անցնի վնասուած հոսանքալարը։ Երեւանի իշխանութիւնները պէտք է քայլեր ձեռնարկեն այս խնդիրը լուծելու եւ Ատրպէյճանը սաստելու համար, քանի որ եթէ այսպէս շարունակուի, այդ պետութիւնը պատուհաս պիտի դառնայ նաեւ մեր հարեւան երկիրներուն համար։