Հեղինակաւոր «Forbes» ամսագիրը կազմած է 2023 թուականին ճանապարհորդութիւններու համար ամէնէն հետաքրքրական ուղղութիւններու ցանկը, ուր տեղ կը  զբաղեցնէ նաեւ Հայաստանը։

«Հայաստանը գեղեցիկ երկիր է, հարուստ պատմութեամբ եւ մշակոյթով։ Այստեղ կան զարմանալի բնապատկերներ. լեռներ, Սեւանայ լիճը, բազմաթիւ հնագոյն ճարտարապետական յուշարձաններ` ինչպիսիք են Գառնիի տաճարը եւ Հաղպատի վանքը։ Անոնցմէ մէկ քանին ընդգրկուած են ԵՈՒՆԷՍՔՕ-ի պատմամշակութային ժառանգութեան ցանկին մէջ»,- կը գրէ հեղինակ Քերոլայն Լուփինի։

Ան նշած է, որ արշաւներու սիրահարները կրնան օգտուիլ 861–քմ երկարութեամբ անդրկովկասեան արահետէն, որ կ’անցնի Հայաստանով:

Ընդգծուած է, որ Հայաստան յայտնի է նաեւ իր համեղ խոհանոցով, ուր կ’օգտագործուին  շարք մը թարմ խոտաբոյսեր եւ համեմունքներ:

Տարեկան քանի մը միլիոն զբօսաշրջիկ կ’այցելէ նաեւ Արեւմտեան Հայաստան, հիանալու հայկական մշակոյթով եւ ճարտարապետութեամբ։ Ցաւօք այսօր թրքական ղեկավարութիւնը կանխամտածուած կերպով մեր տարածաշրջանին մէջ կը շարունակէ մշակութային ցեղասպանութիւնը, փորձելով մաքրել հայկական հետքը։