Տրակինիանի հայերու միութեան (Amicale des Arméniens de Draguignan) նախաձեռնութեամբ եւ անոր նախագահ պարոն  Ժերար Պերուտի հովանաւորութեամբ, Տրակինեանի եւ շրջակայքի հայ համայնքը 2023 թուականի Յունուարի 8-ին հայկական Սուրբ Ծննդեան առթիւ կազմակերպեց հանդիպում, որուն ներկայ էին աւելի քան հարիւր անձ։

Պարոն Պերուտ նշեց, որ Տրակինիանի հայերու միութիւնը հայկական պատմութեան, աւանդոյթներուն եւ մշակոյթին տարածման տեսլականին համապատասխան  կ’իրականացնէ բազմաթիւ ծրագիրներ՝ հայ ժողովուրդին աջակցելու համար։

Հրաւիրուածներու թուին էին Արեւմտեան Հայաստանի Հանրապետութեան նախագահ Արմենակ Աբրահամեան, Արտաքին գործոց նախարար Լիտիա Մարկոսեան, Ազգային ժողովի   Վար 8-րդ ընտրատարածքի պատգամաւոր  Ֆիլիփ Շրեք, ինչպէս նաեւ բազմաթիւ  միութիւններու ղեկավարներ։

Պարոն Աբրահամեան ներկայացուց, թէ ինչ իրավիճակի մէջ յայտնուած է հայ ժողովուրդը եւ  Արեւմտեան Հայաստանը, եւ ինչպէ՞ս կ’աշխատի Արեւմտեան Հայաստանը՝ հայութեան իրաւունքներու պաշտպանութեան գործին մէջ։

Պարոն Աբրահամեան յիշեցուց, որ Արեւմտեան Հայաստանն ու անոր անբաժան մաս Արցախը բռնազաւթուած տարածքներ են, նշելով Արեւմտեան Հայաստանի գոյութեան արդիական իրաւական հիմքերը, ըստ որոնց,  աշխարհասփիւռ հայութիւնը պէտք է պաշտպանէ  Հայաստանի տարածքային ամբողջականութիւնը։

Այս առնչութեամբ պարոն Աբրահամեան աւելցուց, որ ինք ընդդէմ Ատրպէյճանի դիմումներ  ներկայացուցած է Մարդու իրաւունքներու եւրոպական դատարան (ՄԻԵԴ)՝ շուշեցիներու կողմէ տրուած մանդատին հիման վրայ։

Արեւմտեան Հայաստանի Հանրապետութեան Արտաքին գործոց նախարար տիկին Լիտիա Մարկոսեան  ներկայ իրավիճակին վերաբերեալ հանդէս եկաւ ելոյթով, նշելով  Ֆրանսայի խիզախ դիրքորոշումը ՄԱԿ-ի Անվտանգութեան խորհուրդի վերջին նիստերուն։ Ան շնորհակալութիւն յայտնեց Ազգային ժողովին ու Սենատին քուէարկութեան համար, ինչպէս նաեւ Հայաստանին սատարած  բոլոր ներկայացուցիչներուն, այդ թուին՝ պարոն Ֆիլիփ Շրեքին, որ  արժանացաւ ջերմ ծափահարութիւններու։