Ատրպէյճանի նախագահ Իլհամ Ալիեւ կը շարունակէ միջազգային հանրութեան առջեւ ստել Բերձորի միջանցքի՝ արդէն մէկ ամիս շարունակուող արգելափակման վերաբերեալ, թուիթըրեան իր էջին գրած է ԱՄՆ քոնկրէսական Ֆրանք Փալոն՝ անդրադառնալով Ատրպէյճանի ղեկավարին՝ օրերս լրատուամիջոցներուն տուած հարցազրոյցի ընթացքին կատարած յայտարարութիւններուն։

«Կայ յստակ ապացոյց, որ այս բոլորը մարդասիրական ճգնաժամ կ’առաջացնէ Արցախի մէջ՝ արգելափակելով քաղաքացիական անձերու սննդամթերքի ու դեղորայքի կենսական մատակարարումներու իրականացումը: Անհանգստացնող է, որ Ալիեւ կ’ողջունէ «ազատ խօսքը» միայն այն ժամանակ, երբ այն կ’օգտագործուի հայերու կեանքին սպառնալու համար»,- նշած է Փալոն։ Ան ընդգծած է, որ ԱՄՆ Քոնկրէսի հայկական հարցերով յանձնաժողովի  իր գործընկերներուն հետ աշխատանքներ իրականացուցած է՝ դրդելու ԱՄՆ Արտաքին գործոց նախարարութիւնն ու համաշխարհային առաջնորդները լուրջ քայլեր ձեռնարկելու՝ դադրեցնելու համար մարդածին այս աղէտը։

«Յառաջիկայ օրերուն 120 հազար անմեղ կեանք կրնայ սպառնալիքի տակ յայտնուիլ։ Մենք չենք կրնար անմասն մնալով հետեւիլ, թէ ինչպէս մեր աչքին առջեւ իրական աղէտ կը ծաւալի։ Կարողութիւններուս սահմանին մէջ ամէն ջանք ի գործ պիտի դնեմ, որպէսզի ԱՄՆ-ը օգտագործէ բոլոր հնարաւոր դիւանագիտական գործիքները՝ վերջ տալու համար այս դաժան շրջափակման»,- յայտնած է Փալոն։