Հիտրօ-ելեկտրակայաններու, ամբարտակներու եւ շահագործուող հանքերու ճիրաններուն մէջ գտնուող Տերսիմի մէջ, հակառակ անոր, որ վերջին 10 տարուան ընթացքին իրագործուած են ջրամբարներու եւ հիտրօ-ելեկտրակայաններու 6 նախագիծեր, ամէն օր կը շարունակուին բնական տարածքի վարձակալական յատկացումները նոր հանքարդիւնաբերական ընկերութիւններուն։ Քարասու եւ Փերի գետերուն վրայ իրականացուող ծրագիրները կը յանգեցնեն կլիմայի փոփոխութեան։ Քանի մը տասնեակ չվերահսկուող տարածքներու մէջ կը շարունակուին օգտակար հանածոներու որոնման աշխատանքները։ Ամէն օր արդէն իրագործուող ծրագիրներուն կ’աւելնայ նոր ծրագիր, որ ազդեցութիւն պիտի ունենայ մօտաւորապէս 80 գիւղի վրայ:

Մնձուրի վայրի բնութեան պահպանման միութեան նախագահ Հայտար Չեթինքայա այսպէս խօսած է իրավիճակին մասին. «Մինչեւ օրս շահագործուած են աւելի քան 7 հիտրօ-ելեկտրակայաններ: Ամէնէն վտանգաւորը հանքարդիւնաբերական ծրագիրներն են: Նոյնիսկ ամէնէն փոքր հանքարդիւնաբերական նախագիծը նախատեսուած է հարիւրաւոր հեքթարի համար: Մնձուր լեռը, Փուլումուրի հովիտը, Հել լեռը եւ Քարակէօզ սարահարթը շատ կարեւոր վայրեր են բնապահպանական համակարգին համար: Այս տարածքին մէջ նախատեսուած ծրագիրներու նպատակն է ոչնչացնել բնաշխարհը։ Աւելին, մօտաւորապէս 80 գիւղի վրայ բացասաբար ազդող նախագիծերուն ամէն օր կ’աւելնայ նորը»:

Բազմաթիւ են այն դէպքերը, երբ Արեւմտեան Հայաստանի պետական հեռուստակայանը կը լուսաբանէ Արեւմտեան Հայաստանի տարածքին բնապահպանական խնդիրները, որոնց հիմքերը մարդածին են։ Պէտք է իւրաքանչիւր հայ կրէ իր պատասխանատւութիւնը հայրենիքին առջեւ եւ իր բաժին գործը կատարէ մեր բնօրրանի ազատագրման համար։