Յունուարի 13-ին լրացաւ Պաքուի մէջ հայերու ցեղասպանութեան 33-րդ տարելիցը: Այս առթիւ Ատրպէյճան ապրած հայերու համախմբման նախագահ Գրիգորի Այվազեան «Lragir.am»ին տուած հարցազրոյցին պատասխանած է այն հարցադրման, թէ քանի՞ անձ բռնագաղթած է Ատրպէյճանէն եւ ի՞նչ գոյքային վնասներ հաշուարկուած են, մասնաւորապէս նշելով.  «Պաշտօնական թիւերով՝ ջարդերու հետեւանքով Ատրպէյճանէն բռնագաղթած է մօտ 500 հազար անձ։ Բայց ոչ պաշտօնական թիւն աւելի շատ է․ միայն Պաքուէն 500 հազար անձ բռնագաղթած է։ Իսկ պաշտօնական թիւերով՝ Պաքուէն բռնագաղթած է 250 հազար անձ։ Միայն Պաքուէն բռնագաղթած անձերուն Ատրպէյճան պէտք է փոխհատուցէ մօտ 100 միլիար տոլար։ Եթէ Ալիեւ հիմա կ’ըսէ արցախցիներուն, որ պիտի բանան ճանապարհը, եւ ով որ ինքզինք չի համարեր Ատրպէյճանի քաղաքացի, կրնայ դուրս գալ Արցախէն, թող առաջին հերթին յիշէ Պաքուի հայ բնակիչներու ճակատագիրը։ Երբ ինք կը խօսի Սիւնիքի մասին, արդեօք պատրա՞ստ է փոխհատուցել կամ ընդունիլ այդ մարդիկը Պաքուի մէջ»։ 

Արեւմտեան Հայաստանը դրական կը գնահատէ նման նախաձեռնութիւնը, որ զսպող մեխանիզմ է Ատրպէյճանի համար եւ կ’աւելցնէ, որ Պաքուի եւ յարակից քաղաքներու մէջ հայերը ենթարկուած են ունեզրկման ու ցեղասպանութեան: Այնուհետեւ Ատրպէյճան «ազատելով» հայերէն՝ իրագործած է մշակութային ցեղասպանութիւն՝ հայաբնակ տարբեր շրջաններու մէջ: