Եւրոպական խորհրդարանի Յունուարի 18-ի լիագումար նիստի օրակարգին մէջ ներառուած է հրատապ բանավէճ-քննարկում «Արցախի մէջ շրջափակման մարդասիրական հետեւանքները» վերնագիրով, յայտնած է Եւրոպական խորհրդարանի կայքէջը։ Եւրոպական միութեան գործադիր մարմիններուն հետ նախատեսուող բանավէճին Եւրոպական խորհրդարանի անդամները հանդէս պիտի գան ելոյթներով ու պիտի քուէարկեն նոյն հարցով մինչ այդ մշակուելիք հրատապ բանաձեւի ընդունման համար:

Դեկտեմբերի 12-էն ի վեր Ատրպէյճանի կողմէ Բերձորի միջանցքի արգելափակման եւ անոր հետեւանքով առաջացած մարդասիրական ճգնաժամին վերաբերեալ Եւրոպական խորհրդարանի շարք մը անդամներու կողմէ արդէն իսկ տարբեր արձագանգներ հնչած են, այդ թուին՝ ԵՄ գործադիր մարմիններուն ուղղուած նամակներու եւ պատգամաւորական հարցերու տեսքով: