Հայաստանի եւ Արցախի Մարդու իրաւունքներու պաշտպաններու հաստատութիւնները հրապարակած են Բերձորի ճանապարհի արգելափակման մարդասիրական հետեւանքներուն վերաբերեալ արտահերթ զեկոյց՝ 2023թ Յունուարի 13-ի դրութեամբ նոր թարմացուած տուեալներով։ Զեկոյցին մէջ Պաշտպաններն անդրադարձած են Բերձորի ճանապարհի խնդիրին միջազգային կառոյցներու, գործիչներու եւ լրատուամիջոցներու արձագանգին, Բերձորի ճանապարհի շրջափակման վերաբերեալ Ատրպէյճանի բարձրաստիճան պաշտօնեաներու եւ հասարակային գործիչներու կողմէ սադրիչ յայտարարութիւններուն, Ատրպէյճանի բարձրաստիճան պաշտօնեաներու կողմէ ցեղային զտման շարունակական նշաններուն, շրջափակման հետեւանքով առաջացած մարդասիրական ճգնաժամին, «բնապահպաններու» ցոյցի կեղծ էութիւնը հիմնաւորող նոր տուեալներուն, ինչպէս նաեւ Ատրպէյճանի կառավարութեան հետ ճանապարհը ապօրինաբար փակած անձերու անմիջական կապերուն: Զեկոյցին մէջ անդրադարձած են նաեւ բնակչութեան ազատ տեղաշարժի, բաւարար կենսամակարդակի ապահովման, սնունդի հասանելիութեան, առողջութեան պահպանման իրաւունքներուն, ինչպէս նաեւ երեխաներու իրաւունքներու խախտումներուն։ Զեկոյցի տարբեր բաժիններուն մէջ իրաւունքներու խախտումները վերլուծուած են ըստ միջազգային մարդու իրաւունքներու եւ մարդասիրական իրաւունքի սկզբունքներու եւ չափանիշներու։

https://ombuds.am/am/site/ViewNews/2467 https://ombuds.am/images/files/8015e970b4e618c7e518be045acd382b.pdf