Ատրպէյճանի բռնապետը 2023թ. Յունուարի 10-ի ելոյթով կը զարգացնէ կեղծ դրոյթներ. պատմական ու իրաւական փաստերու բացայայտ կեղծումով Հայաստանի Հանրապետութեան տարածքները կ’անուանէ «արեւմտեան Ատրպէյճան»: 

Այս հաղորդագրութիւնը տարածած է «Թաթոյեան» հիմնադրամը, ուր մասնաւորապէս նշուած է․ «Ատրպէյճանի նախագահն այդ ելոյթով կը բորբոքէ հայատեացութիւն եւ թշնամանք, ան կեղծ փաստերով կը փորձէ ստեղծել նաեւ ռազմական յարձակման արհեստական հիմքեր Հայաստանի ու Արցախի նկատմամբ: Պետական սահմաններու սահմանագծման հարցերուն մէջ Հայաստանին ու հայ ժողովուրդին բացայայտ կը սպառնայ ռազմական յարձակումով, պատերազմով՝ փաստերու կեղծումով: Ատրպէյճանի նախագահը բացայայտ կը խօսի ուժի ու սպառնալիքի լեզուով, կ’օգտագործէ այնպիսի բառեր ու արտայայտութիւններ, որոնք կը նսեմացնեն ամբողջ հայ ժողովուրդին, Հայաստանի ու Արցախի ամբողջ բնակչութեան արժանապատւութիւնը, ահաբեկող բնոյթի են: Ակնյայտ են անոր ֆաշիզմի դրսեւորումները»:

«Թաթոյեան» հիմնադրամին կողմէ Ատրպէյճանի նախագահի ելոյթներուն որոշ հատուածներ  առանձնացուած եւ ուղարկուած են ԵԱՀԿ, ՄԱԿ-ի Ցեղային խտրականութեան վերացման կոմիտէ, ԵԽ-ի Ցեղապաշտութեան եւ անհանդուրժողականութեան դէմ յանձնաժողով, ՄԱԿ-ի եւ ԵԽ-ի մարդու իրաւունքներու յանձնակատարներուն եւ միջազգային այլ մարմիններու։

Արեւմտեան Հայաստանը բազմիցս ներկայացուցած է փաստեր, որ բռնազաւթիչ Ատրպէյճանի մէջ կ’ահագնանան ցեղային խտրականութեան դրսեւորումները եւ  ատելութեան խօսքը հարեւան երկիրներու նկատմամբ: Իսկ ինչ կը վերաբերի այն դրոյթին, թէ Արցախի բնիկ հայերը կրնան ապրիլ ատրպէյճանցիներու հետ, կրնանք ընդամէնը մէկ հարց տալ մեր հեռուստադիտողին՝ մտածելու համար. Ու՞ր են այսօր Պաքու եւ այլ քաղաքներ ապրող հայերը…

Leave a Reply