Արցախի Հանրապետութեան Արտաքին գործոց նախկին նախարար, փորձագէտ Դաւիթ Բաբայեան Պաքուի հայերու ջարդերը Ատրպէյճանի կողմէ իրականացուող ցեղասպան քաղաքականութեան դրսեւորումներէն ու ամէնէն արիւնալի դէպքերէն մէկը կը համարէ:

«Արմէնփրէս»ի հետ զրոյցի ժամանակ Դաւիթ Բաբայեան ընդգծած է, որ 1990թ. Յունուարի 13-ը հայ ժողովուրդի պատմութեան ամէնէն ողբերգական եւ սեւ էջերէն մէկն է: «Այդ օրը Ատրպէյճանի մայրաքաղաք Պաքուի մէջ սկսան հայերու զանգուածային ջարդերը:  Պէտք է ըլլանք միասնական, ճիշդ քաղաքականութիւն վարենք, կիրթ եւ հայրենասէր հասարակութիւն ձեւաւորենք. միայն այդ պարագային հնարաւոր պիտի ըլլայ խուսափիլ Պաքուի մէջ տեղի ունեցած ջարդերուն նման ծանր փորձութիւններէն»,- նշած է Բաբայեան:

Անոր խօսքով, տասնամեակներ շարունակ Ատրպէյճանի կողմէ  իրականացուած են  հայաթափման ծրագիրներ,  ու Պաքուի ջարդերն ալ Ատրպէյճանի կողմէ իրականացուող  ցեղասպան քաղաքականութեան ամէնէն արիւնալի դէպքերէն  եղած են:

Անդրադառնալով այն հարցին, թէ Պաքուի ջարդերուն հետեւանքով տուժած քաղաքացիներու իրաւունքներու վերականգնման առումով ինչպիսի քայլեր պէտք է կատարուին՝ Բաբայեան նշած է, որ առաջին հերթին պէտք է քաղաքական. պատասխանատւութեան ենթարկել Ատրպէյճանը եւ կիրառել պատժամիջոցներ, բայց միջազգային հանրութիւնը դժուար թէ այս պահուն, իր իսկ  շահերէն ելլելով, դիմէ այդ քայլին:

Արեւմտեան Հայաստանը միջազգային տարբեր հարթակներէ խօսելով Հայաստան պետութեան առջեւ  ծառացած խնդիրներուն մասին, առանձնայատուկ կերպով կ’անդրադառնայ Արցախին եւ արցախահայութեան իրաւունքներուն: Այն, ինչ որ այժմ կը կատարուի մեր տարածաշրջանին մէջ, միջազգային հանրութեան լռութեան եւ թողտւութեան արդիւքն է: