Երուսաղէմի հայկական թաղամասին մէջ հինգ տարի տեւած վերակառուցումէն ետք իր դռները վերաբացած է Հայաստանի պատմութեան թանգարանը: 

Տնօրէն Ցօղիկ Քարաքաշեան նշած է, որ թանգարանը նախատեսուած է ծառայելու որպէս «հայերու կեանքի ուղեցոյց»։

Մինչ վերակառուցումը թանգարանի շէնքը, որ ի սկզբանէ եղած է 1850-ականներուն կառուցուած ուխտաւորներու պանդոկ, ծառայած է որպէս վանք, որբանոց Ցեղասպանութենէն փրկուած երեխաներուն համար, ուսումնարան եւ, վերջապէս, փոքրիկ թանգարան եւ գրադարան։

Թանգարանի կեդրոնական ցուցանմոյշը 5րդ կամ 6րդ դարերու խճանկարն է, որ յայտնաբերուած է 1894 թուականին հին հայկական վանական համալիրի տարածքին։ Այն ունի հայերէն մակագրութիւն՝ նուիրուած «բոլոր հայերու յիշատակին եւ փրկութեան, որոնց անունները Տէրը գիտի»։

Թանգարանը կը ցուցադրէ հայկական նիւթական արուեստը, ինչպէս նաեւ կը պատմէ տարածաշրջանին մէջ գոյատեւման հայկական պատմութիւնը:

Երուսաղէմ կ’ապրի մօտ 6000 հայ, որոնցմէ շատեր հայերու դէմ իրագործուած Ցեղասպանութենէն մազապուրծ փրկուածներու ժառանգներ են։

Leave a Reply