Եւրոպական խորհրդարանի պատգամաւոր Նաթալի Լուազու անդրադարձած է Ատրպէյճանի կողմէ Բերձորի ճանապարհը փակելուն՝ շեշտելով, որ Արցախ կտրուած է աշխարհէն։ Պատգամաւորն այս հարցին անդրադարձած է Եւրոպական խորհրդարանին մէջ «Արցախի շրջափակման մարդասիրական հետեւանքները» խորագիրը կրող քննարկման ընթացքին։

Անդրադառնալով Ատրոէյճանի պաշտօնեաներուն կողմէ հնչող յայտարարութիւններուն, թէ շրջափակում չկայ, պատգամաւորն ընդգծած է՝ Բերձորի ճանապարհին ռազմաշունչ «բնապահպաններ» կանգնած են։ «Նախագահ Ալիեւ կ’ըսէ, որ Արցախի բնակչութեան կը վերաբերի այնպէս, ինչպէս Ատրպէյճանի միւս բնակիչներուն, բայց այս շրջափակումը իր ժողովուրդին նկատմա՞մբ կը կիրառէ։ Ի՞նչ պիտի ընէ․ կ’ըսէ, որ իւրաքանչիւր անձ, որ չի ցանկար Արցախ ապրիլ որպէս Ատրպէյճանի քաղաքացի, կրնայ հեռանալ։ Հետեւաբար, սա աւելին է քան շրջափակում, այս շանտաժէ աւելին է, ան ցեղային զտում կ’իրականացնէ։ Ի՞նչ կ’ընենք մենք, ոչինչ»,- ըսած է ան։

Արեւմտեան Հայաստնաը կը հորդորէ միջազգային կառոյցներուն եւ գերտերութիւններու ղեկավարներուն ուշադրութիւն դարձնել այս տարածաշրջանին մէջ տեղի ունեցող դէպքերուն եւ յատկապէս նախագահ Ալիեւին յիշեցնել, որ Արցախը Ատրպէյճանի կազմին մէջ չէ։