Եւրոպական խորհրդարանի՝ Յունուարի 16-էն 19-ի լիագումար նստաշրջանի ընթացքին՝ Յունուարի 18-ին կայացած քուէարկութեամբ, ընդունուեցաւ «Ընդհանուր արտաքին ու անվտանգային քաղաքականութեան իրականացում. 2022թ. տարեկան զեկոյց» (CFSP) բանաձեւը։

Այս արտաքին քաղաքական հարցերով ԵԽ տարեկան հիմնական զեկոյցն է եւ անով որեւէ ձեւակերպման համաձայնեցում ու ընդունում կը ձեւաւորէ ԵԽ միասնական քաղաքական գիծը:

Կը ներկայացնենք զեկոյցէն որոշ հատուածներ.

  • Խստօրէն կը դատապարտուի Հայաստանի ինքնիշխան տարածքին նկատմամբ Ատպրպէյճանի 2022թ. Սեպտեմբերի յարձակումը, որ զինադադարի խախտում է եւ լուրջ հետեւանքներ ունի խաղաղութեան գործընթացին համար:
  • Կը վերահաստատուի, որ Հայաստանի տարածքային ամբողջականութիւնը պէտք է լիարժէքօրէն յարգուի եւ կոչ կ’ուղղուի ատրպէյճանական իշխանութիւններուն անմիջապէս դուրս բերել զօրքերը Հայաստանի բոլոր տարածքներէն:
  • Համոզմունք կ’արտայայտուի առ այն, որ ռազմական միջոցներով Հայաստանի եւ Ատրպէյճանի միջեւ կայուն խաղաղութեան հասնիլ հնարաւոր չէ: Այն կը պահանջէ համապարփակ քաղաքական կարգաւորում՝ միջազգային իրաւունքին համապատասխան՝ ներառեալ ՄԱԿ կանոնադրութիւնը, ԵԱՀԿ 1975 Հելսինկեան եզրափակիչ որոշումը, ինչպէս նաեւ ԵԱՀԿ ՄԽ 2009թ. հիմնարար՝ տարածքային ամբողջականութեան, ինքնորոշման եւ ուժի կիրառումը բացառելու սկզբունքները:
  • Մտահոգութիւն կ’արտայայտուի Ատրպէյճանի ԶՈՒ կողմէ հայ ռազմագերիներու եւ քաղաքացիական անձերու նկատմամբ պատերազմական յանցագործութիւններուն եւ անմարդկային վերաբերմունքին համար, եւ կոչ կ’ուղղուի ատրպէյճանական իշխանութիւններուն ազատել իրենց հսկողութեան տակ գտնուող ռազմագերիները:
  • Կ’ողջունուի Ատրպէյճանի հետ Հայաստանի սահմանին ԵՄ քաղաքացիական առաքելութեան տեղակայումը եւ կոչ կ’ուղղուի ԵՄ խորհուրդին ընդլայնել տեղակայուած փորձագէտներու քանակը, ամրապնդել ներկայութիւնը տարածաշրջանին մէջ:

ԵԽ Յունուարի 18-ի լիագումար նիստին ընդունուեցաւ նաեւ զեկոյցին՝ Ատրպէյճանի կողմէ Բերձորի միջանցքի արգելափակման վերաբերեալ ներկայացուած լրամշակում, որուն մէջ նշուած է. «Եւրոպական խորհրդարանը խստօրէն կը դատապարտէ Ատրպէյճանի կողմէ 2020 թուականի Նոյեմբերի 9-ի եռակողմ յայտարարութեան խախտմամբ Բերձորի միջանցքի ապօրինի շրջափակումը, որուն նպատակն է մարդասիրական ճգնաժամ ստեղծել Լեռնային Ղարաբաղի ժողովուրդին համար: Խորհրդարանը կը պահանջէ Ատրպէյճանի իշխանութիւններէն անյապաղ վերականգնել Բերձորի միջանցքով տեղաշարժի ազատութիւնը»:

https://www.europarl.europa.eu/doceo/document/A-9-2022-0292_EN.html

Leave a Reply