«Լուսիկ Ագուլեցի» հիմնադրամի տնօրէն Գայեանէ Սամուէլեան, անդրադառնալով հայկական աւանդոյթներու ստեղծման, անոնց պատմութեան  ու կիրառման, նշեց, որ ներկայիս բաւական նորաձեւ դարձած են հայկական տարազով ամուսնութիւնները, մարդիկ սկսած են հետաքրքրուիլ հայկական աւանդոյթներով, հին հայկական կենցաղով։

Ի տարբերութիւն մեր օրերուն` անցեալին Նոր տարուան ծէսը հայ ժողովուրդին համար հոգեւոր իմաստ ունեցած է։ Ինչպէս կը նշէ Սամուէլեան` այդ օրերուն մարդը մաքրուած է բացասական յոյզերէ, փորձած է վատը ձգել անցնող տարուան մէջ։ 

Սամուէլեան նշած  է, որ հայկական աւանդոյթներուն նկատմամբ վերջին շրջանին որոշ հետաքրքրութիւն կը նկատէ, մասնաւորապէս՝ ազգագրագէտ Լուսիկ Ագուլեցիի տուն–թանգարան կ’այցելեն տարբեր սերունդներու ներկայացուցիչներ` ծանօթանալու, թէ ինչպիսի կենցաղավարութիւն ունեցած են հայերը։ 

Ամփոփելով, Գայեանէ Սամուէլեան ընդգծած է, որ իւրաքանչիւր տարածաշրջան իր սովորութիւններն ու աւանդոյթներն ունեցած է, զորս մասամբ կը փորձէ պահպանել մեծ ու փոքր տօներու ժամանակ։ Այս սովորութիւններն ու աւանդոյթները միաւորած են հայերը։