Վահան Թեքէեան ծնած է Կ. Պոլսոյ Օրթագիւղ թաղամասը։ Ուսումը ստացած է Կ.Պոլսոյ Ներսէսեան, Պէրպէրեան, Կեդրոնական վարժարաններէն: 

Հայ բանաստեղծութեան հարուստ աշխարհին մէջ իրենց ուրոյն ու չքնաղ երանգներն ունին Վ. Թեքէեանի ստեղծագործութիւնները։ Ան Ցեղասպանութենէն պատահաբար փրկուած հայ այն լաւագոյն ստեղծագործողն է, որ բարձր պահեց ապագայի հաւատը եւ իր ստեղծագործութիւններուն մէջ արծարծեց կենսուրախութեան եւ հերոսութեան գաղափարները։

1905թ. Ալեքսանդրիոյ մէջ հիմնադրած է «Շիրակ» հանդէսը: 1908թ. այն փոխադրած է Կ.Պոլիս, հրատարակած որպէս շաբաթաթերթ: Եղած է «Արեւ», «Ժողովուրդի ձայն» եւ այլ պարբերականներու խմբագիրը: Առաջին աշխարհամարտէն ետք մասնակցած է որբահաւաքման գործին, իբրեւ ուսուցիչ աշխատած Կ.Պոլսոյ, Կիպրոսի եւ այլ վայրերու հայ ազգային վարժարաններուն մէջ: Գրական ասպարէզ մտած է 19-րդ դարու 90-ական թուականներուն: Ան արեւմտահայ դասական բանաստեղծութեան վերջին եւ սփիւռքահայ բանաստեղծութեան առաջին խոշոր դէմքն է: Առաջին ստեղծագործութիւնը («Կաղանդը Կեսարիոյ մէջ») տպագրուած է 1894թ., Կ. Պոլսոյ «Հայրենիք» թերթին մէջ: 

Անոր «Կէս գիշերէն մինչեւ արշալոյս» (1918թ.) գիրքին մէջ արտայայտուած են Հայոց Ցեղասպանութեան (1915թ.) սարսափները, բնաջնջուող ժողովուրդի տառապանքի հոգեբանութիւնը: 

Գրած է հրապարակախօսական եւ գրական բազմազան յօդուածներ: Մահացած է Գահիրէ: 1947թ. Պէյրութի մէջ անոր անունով ստեղծուած է «Թեքէեան» մշակութային միութիւնը, որ աշխարհի բազմաթիւ հայկական գաղթօճախներուն մէջ ունի մասնաճիւղեր:

Leave a Reply