Այսօր Պրիւքսէլի մէջ նախանշուած է ԵՄ Արտաքին յարաբերութիւններու խորհուրդի նիստը, զոր պիտի նախագահէ Եւրոպական միութեան արտաքին յարաբերութիւններու եւ անվտանգութեան հարցերով բարձր ներկայացուցիչ Ժոզէփ Պորէլ։

Եւրոպական խորհուրդի պաշտօնական կայքէն կը տեղեկանանք, որ ի թիւս այլ հարցերու՝ պիտի քննարկուի նաեւ Հայաստանի Հանրապետութիւն նոր առաքելութիւն ուղարկելու հարցը, որ պիտի նպաստէ տարածաշրջանին մէջ իրավիճակի կարգաւորման։

«Կ’ակնկալուի, որ նախարարները որոշում կայացնեն տարածաշրջանին մէջ կայունութեան նպաստելու համար առաքելութիւն ստեղծելու մասին»,- յայտնած է ԵՄ բարձրաստիճան պաշտօնեաներէն մէկը։

Դիւանագէտին խօսքով, ԵՄ-ը մտահոգութեամբ կը հետեւի Բերձորի ճանապարհին շուրջ տեղի ունեցող իրադարձութիւններուն եւ ջանքեր կը գործադրէ իրավիճակը կարգաւորելու համար։

Եւրոպական միութեան կողմէ գործադրուող ջանքերը առաւել քան հասցէական պէտք է ըլլան, մինչեւ անգամ բռնազաւթիչ Ատրպէյճանի դէմ բիրտ ուժի կիրառմամբ: Պէտք է պատժամիջոցներ կիրառել զաւթիչ երկրին նկատմամբ, որ այս պահուն 120 հազար բնիկ հայեր կը պահէ պատանդի կարգավիճակով, լուրջ մարդասիրական ճգնաժամ առաջացնելով այնտեղ:

Leave a Reply