Ատրպէյճանի կողմէ Արցախի շրջափակման հետեւանքով Արցախի Հանրապետութեան Մարտունի շրջանի Հացի համայնքը կանգնած է շարք մը խնդիրներու առջեւ, «Արցախփրէս»ի թղթակիցին հետ զրոյցի ժամանակ յայտնած է Հացիի համայնքապետ Սանթուր Սարգսեան։ «Խանութներուն մէջ ապրանքատեսակներ չկան, վառելանիւթի լուրջ խնդիր ունինք, վերջին օրերուն ալ զրկուած ենք բնական  կազէ, որուն հետեւանքով  գրեթէ անհնար դարձած է փոխադրամիջոցներ օգտագործելը։ Այս բոլորին զուգահեռ` թշնամին կրակ կը բանայ աշնանացանի աշխատանքներ իրականացնող գիւղացիներուն ուղղութեամբ։ Այդ ցաւալի փաստով պայմանաւորուած` այս պահուն ամբողջ համայնքի տարածքին դադրեցուած են գիւղատնտեսական աշխատանքները»,- մանրամասնած է Ս. Սարգսեան։

Անոր իրազեկմամբ, կանաչեղէնի պահանջը  որոշակիօրէն կը բաւարարեն գիւղին մէջ ժամանակին տեղադրուած  ջերմոցները։ Այն նաեւ քանի մը ընտանիքներու համար եկամուտի աղբիւր է։ Բայց անով մարդասիրական ճգնաժամը յաղթահարելը դժուար է։

Համայնքապետը կը հաւաստէ, որ հակառակ Արցախի մէջ ստեղծուած ծանր իրավիճակին, հայրենի հողին վրայ խաղաղ ապրիլն  ու  արարելը բնակիչներու նպատակն ու ցանկութիւնն է։ 

«Բոլորս աւելի շատ կ’անհանգստացնէ մեր երկրի անվտանգութիւնը եւ մեր հարցի  վերջնական կարգաւորումը»,- աւելցուցած է Ս. Սարգսեան։

Արեւմտեան Հայաստանը իր զօրակցութիւնը կը յայտնէ բռնազաւթիչ Ատրպէյճանի կողմէ շրջափակման մէջ յայտնուած Արցախի բնիկներուն։ Այժմ  հսկայածաւալ աշխատանքներ կը տարուին ապաշրջափակման համար, յոյս յայտնելով, որ շուտով Արցախը Գորիսի տարածաշրջանին կապող ճանապարհը պիտի վերաբացուի։