Հայաստանի պատմութեան եւ Էրեբունի պատմահնագիտական թանգարաններու ցուցանմուշները պիտի ներկայացուին Բրիտանական թանգարանին մէջ: «Շքեղութիւն եւ ուժ. Պարսկաստանէն Յունաստան» խորագիրով ցուցահանդէսին բացումը կը սպասուի Մայիսին, նշած է Հայաստանի պատմութեան թանգարանի տնօրէն Դաւիթ Պօղոսեան: 

«Նախորդ տարի Բրիտանական թանգարանի «Միջին Արեւելք» բաժնի ղեկավարն անձամբ եկաւ թանգարան յատուկ մեր հաւաքածուներու ցուցադրութեան համար խնդրանքով: Ան հիացած էր այն եզակի ցուցանմուշներով, որոնք մեր հաւաքածուներուն մէջ առկայ են: Հիմա կ’աշխատինք Բրիտանական թանգարանի մեր գործընկերներուն հետ այդ մեծ ցուցահանդէսին նախապատրաստուելու համար: Բրիտանական թանգարանը մեզմէ պիտի փոխառնէ Աքեմենեան եւ անտիկ շրջանի որոշ նիւթեր ու այդ ցուցադրութեան մէջ պիտի ներկայացնէ հայկական առանձնայատկութիւնները»,- յայտնած է Դաւիթ Պօղոսեան:  

Այս տարուան ընթացքին կը սպասուի նաեւ ցուցադրութիւն Ռուսիոյ մէջ: Նիւթը պիտի ըլլայ ուրարտական շրջանի ժառանգութիւնը: