ԿԻԼԻԿԻԱ – Ռուսաստանը Յուլիսի 18-ին նախազգուշացուցեր է քիմիական յարձակման նոր ծրագրի դէմ՝ Սուրիոյ Իդլիբ նահանգին մէջ:

Քիմիական զէնքի կիրառման նոր սադրանք կը նախապատրաստուի Իդլիբ նահանգի մէջ, նախազգուշացուցած է Մոսկուան Յուլիսի 18-ին՝ ըստ Interfax-ի: Իդլիբը կը վերահսկուի Անկարային կողմնակից զինուած խմբաւորումներու կողմէ:

Ինչպէս միշտ, երբ Սուրիական բանակի յաղթանակը կը դառնայ յստակ՝ ինչպէս ժայռաբուխ ջուր, հակա-Դիմադրական ուժերը քայլեր կը ձեռնարկեն ծրագիր իրականացնելու համար Սուրիական կառավարութեան դէմ, վկայելու համար, որ ան քիմիական զէնք կ՛օգտագործէ խաղաղ բնակիչներուն վրայ:

Դար՛ա – Բանակը կը շարունակէ առաջ ընթանալ

Սուրիական բանակը կը շարունակէ գործողութիւնները Սուրիոյ հարաւակողմը գտնուող Դար՛ա նահանգի հիւսիս-արեւմուտքին: Պատերազմի դաշտերուն մէջ գործող աղբիւրներուն համաձայն՝ ան կրցաւ վերականգնել քանի մը գիւղերու եւ բլուրներու վերահսկողութիւնը Դար՛այէն հիւսիս-արեւմուտք գտնուող Ջասիմ աւանի արեւմուտքին:

Սուրիոյ կառավարութիւնը եւ Դար՛այի հիւսիս-արեւմուտքին գտնուող Ալ-Նամար քաղաքին մէջ գործող զինուած խումբերուն միջեւ ձեռք բերուած պայմանաւորուածութեան համաձայն՝ Սուրիական ուժերը մտած են տարածաշրջան:
Ցամաքային գործողութիւններուն հետ մէկտեղ՝ Սուրիական օդուժը յարձակած է ալ-Ջաբիյա լեռներուն ապաստանած զինուած խումբերու դիրքերուն վրայ, եւ Դար՛այի արեւմտեան արուարձաններու Թասիլ եւ ալ-Շէյխ Սա՛ադ քաղաքներուն մէջ գտնուող Դա՛էշի զինեալներուն վրայ։
Զինուած ծայրայեղականներուն մօտիկ աղբիւրները հաստատելով «մահուան եռանկիւնի» կոչուող Դար՛այի շրջանէն Սուրիական բանակի առաջընթացը՝ յայտարարած են, որ կառավարութիւնը կը վերահսկէ նահանգի 91 տոկոսը։ Մնացած մասը կը գտնուի Դա՛էշի գործակից Ջէյշ Խալիդ Իբն ալ-Ուալիդ ահաբեկչական խմբաւորման գրաւման ներքոյ:

Դար՛այի շրջանի ալ-Հիրակի, Էլմայի եւ Էլ Սուրայի բնակիչները իրենց աջակցութիւնը ցուցաբերած են նախագահ Ասադին: Անոնք Սուրիական դրօշակները բարձրացուցած են ահաբեկիչներու կողմէ մաքրուած Բուսրատ ալ-Շամի գլխաւոր հրապարակին:
Սուրիոյ պաշտօնական SANA գործակալութիւնը Չորեքշաբթի օր յայտարարած է Դար՛ա քաղաքէն 4 կմ հեռաւորութեան վրայ գտնուող Ալ-Նայմայի 7000 տեղահանուած բնակիչներու վերադարձին մասին: Ընդհանուր առմամբ, մօտ 10,700 տեղահանուածներ վերջերս վերադարձած են տուն:

Սուրիական բանակը վերջին օրերուն հասցուցեր է ահաբեկիչներէն ազատել եւ վերահսկել Ալ-Մալ եւ Ալ-Հարա բարձունքները, ինչպէս եւ վերցնել Դար՛այի եւ Քունէյթրայի նահանգներուն միջեւ գտնուող վարչական սահմանները:

presstv.com