Թրքական բանակը օժանդակ զօրքեր ուղարկած է Սուրիոյ սահմաններուն վրայ գտնուող իր ուժերն ամրապնդելու համար։ Սեպտեմբեր 16-ին ուղարկուած նոր զէնքեր եւ սարքաւորումներ կրող փոխադրամիջոցները ժամանեցին Թիւրքիոյ Քիլիս նահանգ, Սուրիոյ սահմանին:
Ռազմական զօրասիւնը կը ներառնէ զրահապատ մեքենաներ, հրետանային թնդանոթներ եւ մարտակառքեր։
Նոր զօրասիւնը կ՛ուղեւորուի Սուրիոյ սահման, քանի որ Սուրիական բանակը կը պատրաստուի Սուրիոյ մէջ ահաբեկիչներու վերջին մեծ միջնաբերդին դէմ խոշոր գործողութիւն իրականացնելու:
Պէտք է նշել, որ Ռուսական եւ Սուրիական մարտական ինքնաթիռները արդէն սկսած են ռմբակոծել Թիւրքիոյ հետ սահմանային գօտիի ահաբեկչական դիրքերը:
Ռազմական գետնի վրայ, Անկարայի կառավարութիւնը մեծ քանակութեամբ զինուորներ եւ ռազմական սարքաւորումներ ուղարկած է Սուրիոյ սահման: Ըստ թրքական մամուլին՝ թրքական բանակը կը մարզէ Ազատ Սուրիոյ Բանակի (ASL) կազմակերպութեան մօտ 20.000 մարտիկ: Որոշ աղբիւրներ կը խօսին Անկարայի կողմէ աջակցութիւն գտած խմբաւորումներու եւ Սուրիական բանակի միջեւ բախումներու հնարաւորութեան մասին: Վերլուծաբաններուն կարծիքով՝ Սուրիական սահմանին վրայ թրքական ռազմական տեղաշարժերը նոյնիսկ կը խրախուսեն Սուրիոյ հիւսիսին գտնուող Իդլիբի ահաբեկչական խմբաւորումները: