Վարչապետ Նիկոլ Փաշինեանը Նիւ Եորքի մէջ հանդիպած է Իրանի նախագահ Հասան Ռոհանիի հետ: Զրուցակիցները քննարկած են հայ-իրանական յարաբերութիւններու օրակարգային տարբեր հարցերը: Զրուցակիցները կարեւորած են տնտեսական համագործակցութեան զարգացումը, եւ նշած են, թէ այն զգալիօրէն կը զիջի երկկողմ քաղաքական յարաբերութիւններու մակարդակին: Նիկոլ Փաշինեանն ընդգծած է, որ հայ-իրանական յարաբերութիւններն ունին առանձնայատուկ բնոյթ եւ անոնք պէտք է շարունակեն զարգանալ բարեկամական ամուր կապերու հիմքի վրայ:

Իր հերթին, Հասան Ռոհանին նշած է, թէ երկու երկրներուն միջեւ առկայ է վստահութեան բարձր մակարդակ: Իրանի նախագահի խօսքով` հայ համայնքն իր երկրին մէջ ունի կարեւոր դերակատարութիւն, եւ մեծ յարգանք կը վայելէ իրանցիներու մօտ: Խօսելով տնտեսական փոխգործակցութեան մասին` Հասան Ռոհանին համոզմունք  յայտնած է, որ Եւրասիական տնտեսական միութեան հետ ստորագրուած ազատ առեւտուրի գօտիի ձեւաւորման միտուած համաձայնագիրը եւս հնարաւորութիւն կուտայ աւելի խորացնելու հայ-իրանական տնտեսական գործակցութիւնը:

Հասան Ռոհանին վարչապետ Փաշինեանին հրաւիրած է Իրան, եւ համոզմունք յայտնած է որ, այցը հնարաւորութիւն կուտայ առաւել ընդգրկուն քննարկելու երկկողմ համագործակցութիւնն ընդլայնելու ուղղիները: